- २३ श्रावण २०८३, शनिबार / Aug 8, 2026
काठमाडौँ, ८ बैशाख । कपिलवस्तु प्रहरीले सुन चोरी प्रकरणमा संलग्न रहेको आरोपमा दुई जना पाकिस्तानी नागरिकलाई पक्राउ गरेको छ ।
जिल्ला प्रहरी कार्यालय कपिलवस्तुका अनुसार पक्राउ पर्नेमा २३ वर्षीय इरफान अली र ४४ वर्षीय सैफ उर रहमान रहेका छन् । उनीहरूलाई वैशाख ५ गते पक्राउ गरिएको हो । प्रहरीले उनीहरूको साथबाट १७ हजार १३६ अमेरिकी डलर सहित साउदी रियाल, बंगलादेशी टाका, युएई दिराम, मलेसियन रिंगेट तथा दुई थान मोबाइल बरामद गरेको जनाएको छ ।
स्थानीय तथा सुनचाँदी व्यवसायीलाई अपरिचित व्यक्तिहरूले अल्मल्याएर सुन चोरी गर्ने गरेको सूचनाका आधारमा प्रहरी अनुसन्धानमा जुटेको थियो । यसअघि चैत ३० गते २० वर्षीया बिबी कालसुम र ४१ वर्षीया शबानालाई पनि प्रहरीले पक्राउ गरेको थियो । उनीहरूबाट प्राप्त सूचनाका आधारमा थप अनुसन्धान अघि बढाउँदै जाँदा त्रिभुवन अन्तर्राष्ट्रिय विमानस्थलबाट दुई पुरुषलाई नियन्त्रणमा लिइएको प्रहरीले जनाएको छ ।
यस प्रकरणबारे थप अनुसन्धान भइरहेको प्रहरीले जनाएको छ ।
