- ७ जेष्ठ २०८३, बिहीबार / May 21, 2026
काठमाडौं । पर्वहरू कुनै खास जाति वा समुदाय विशेषका नभएर सिङ्गो राष्ट्रका साझा पर्व भएको प्रधानमन्त्री पुष्पकमल दाहाल ‘प्रचण्ड’ले बताएका छन् । सोनाम ल्होछारको शुभकामना दिँदै उनले नेपालको संविधानले विभिन्न सभ्यता, भाषा, कला, संस्कृति, लिपि, भेषभुषा र सांस्कृतिक सम्पदाको संरक्षण गर्दै आएको बताए ।
प्रकृतिपूजकहरूको पर्वका रूपमा परिचित ल्होछारमा विभिन्न मिष्ठान्न भोजनका साथै आफ्नो समुदायको मौलिक संस्कृति र परम्पराअनुसारको सांस्कृतिक कार्यक्रमसहित हर्ष उल्लासका साथ यो पर्व मनाउन शुभकामना दिदै प्रधानमन्त्री प्रचण्डले आदिवासी जनजाति कला सस्कृतिमा अगाडि रहेको बताए ।
देशभक्तिलाई केन्द्रमा राख्दै अनुशरण गरिने अक्षुण एकता, सद्भाव र सहिष्णुता हाम्रो राष्ट्रिय विशेषता र पहिचानसमेत भएको उल्लेख गर्दै प्रधानमन्त्री प्रचण्डले भने, ‘विविधतामा आधारित राष्ट्रिय एकता र पहिचानलाई संस्थागत गर्दै बहुजातीय, बहुभाषिक, बहुधार्मिक र बहुसांस्कृतिक विशेषता एवं भौगोलिक विविधतासहितको एकत्वलाई राष्ट्रियताको मेरूदण्डका रूपमा आत्मसात गरेको छ।
विभिन्न जाति एवं समुदायका धार्मिक तथा सांस्कृतिक आस्थालाई सम्मान गर्दै विभिन्न सभ्यता, भाषा, कला, संस्कृति, लिपि, भेषभुषा र सांस्कृतिक सम्पदाको संरक्षण हुँदै आएको छ।’ ल्होछार पर्वले पारम्परिक सद्भाव र सहिष्णुताको भावनालाई अझः प्रगाढ र सुदृढ बनाउँदै सामाजिक न्याय, सुशासन, दिगो विकास र समृद्धि हासिल गर्ने सरकारको लक्ष्य साकार पार्न एकताबद्ध हुन थप प्रेरणा प्रदान गर्नेमा पनि विश्वास व्यक्त गरे।
