- २९ श्रावण २०८३, शुक्रबार / Aug 14, 2026
काठमाडौं, ३० बैशाख । संघीय संसद अन्तर्गत प्रतिनिधिसभाको बुधबारको बैठकमा प्रधानमन्त्री बालेन शाहको राजीनामा माग गर्दै प्रतिपक्षी दलका सांसदहरूले विरोध जनाएका छन्।
सरकारको आगामी आर्थिक वर्षको नीति तथा कार्यक्रममाथि उठेका प्रश्नको जवाफ दिन प्रधानमन्त्री बालेन शाहको तर्फबाट अर्थमन्त्री डा. स्वर्णिम वाग्ले संसदमा उपस्थित भएपछि प्रतिपक्षी सांसदहरू आक्रोशित बनेका हुन्।
बैठक सुरु भएपछि सभामुख डोलप्रसाद अर्याल ले अर्थमन्त्री डा. स्वर्णिम वाग्ले लाई बोल्न समय दिएसँगै प्रतिपक्षी सांसदहरू आफ्नो स्थानबाट उठेर विरोधमा उत्रिएका थिए। प्रतिपक्षी दलका सांसदहरूले प्रधानमन्त्री बालेन शाह स्वयं संसदमा उपस्थित भएर जवाफ दिनुपर्ने अडान राख्दै नाराबाजी गरेका थिए। उनीहरूले प्रधानमन्त्री अनुपस्थित रहनु संसदप्रति गैरजिम्मेवार व्यवहार भएको आरोपसमेत लगाएका छन्।
विरोधका बीच सभामुख अर्यालले सांसदहरूलाई आफ्ना स्थानमा बस्न तथा संसदको कारबाही सञ्चालनमा सहयोग गर्न आग्रह गरिरहेका थिए। केही समय बैठक तनावपूर्ण बनेको थियो। संसदमा जारी अवरोधका कारण बैठकको कार्यसूची प्रभावित हुने सम्भावना देखिएको छ।
