- ११ जेष्ठ २०८३, सोमबार / May 25, 2026
काठमाडौं, १२ फागुन । काठमाडौंस्थित विशेष अदालतले पोखरा अन्तर्राष्ट्रिय विमानस्थल निर्माणमा लागत अस्वाभाविक रूपमा बढाइएको आरोपसम्बन्धी भ्रष्टाचार मुद्दामा पूर्वसचिव सुशील घिमिरेसँग एक लाख ५० हजार रुपैयाँ धरौटी माग गरेको छ ।
विशेष अदालत, काठमाडौं इजलास नम्बर २ का सदस्यहरू नारायणप्रसाद पौडेल, उमेश कोइराला र विदुर कोइरालाको संयुक्त इजलासले मंगलबार उक्त आदेश जारी गरेको हो । अख्तियार दुरुपयोग अनुसन्धान आयोगले घिमिरेविरुद्ध ७४ करोड ३४ लाख ३४ हजार ४५० अमेरिकी डलर बराबरको हानी पुर्याएको अभियोगसहित भ्रष्टाचार निवारण ऐन, २०५९ अन्तर्गत कारबाही माग गर्दै आरोपपत्र दायर गरेको थियो ।
अभियोगअनुसार तत्कालीन संस्कृति, पर्यटन तथा नागरिक उड्डयन मन्त्रालयका सचिव रहेका घिमिरेले अन्य प्रतिवादीसँग मिलेमतो गरी स्वीकृत लागत १६ करोड ९६ लाख ९७ हजार अमेरिकी डलरबाट बढाएर २४ करोड ४० लाख ४ हजार ४५० अमेरिकी डलर पुर्याई नेपाल नागरिक उड्डयन प्राधिकरणलाई हानी पुर्याएको दाबी गरिएको छ ।
घिमिरेले भने अनुसन्धान तथा अदालतमा दिएको बयानमा आफूविरुद्ध लगाइएका आरोप अस्वीकार गरेका छन् । अदालतले मिसिल संलग्न कागजात, मन्त्रिपरिषद् तथा प्राधिकरणका निर्णय र प्रतिवादीको पदीय जिम्मेवारीलाई आधार मान्दै विशेष अदालत ऐन, २०५९ को दफा ७ (घ) अनुसार मुद्दा पुर्पक्षका लागि धरौटीमा रिहा गर्ने आदेश दिएको हो ।
