- ४ जेष्ठ २०८३, सोमबार / May 18, 2026
काठमाडौं, १२ फागुन । काठमाडौंमा आयोजित चुनावी सभालाई सम्बोधन गर्दै राष्ट्रिय स्वतन्त्र पार्टीका सभापति रवि लामिछानेले चुनाव सार्ने भए चार दिन अघि सार्न प्रस्ताव गरेका छन् ।
इटहरीमा भएको सभामा उनले चुनाव सार्ने चर्चा चलिरहेको सन्दर्भमा चार दिनअघि सार्न आफूहरू तयार रहेको बताए । उनले अब चुनाव सार्ने बहस नगरी निर्वाचन सम्पन्न गरी जनताको मतादेश स्वीकार गर्नुपर्ने धारणा राखे । लोकतन्त्र जोगाउने जिम्मा जनताकै भएको उल्लेख गर्दै उनले लोकतन्त्रको ठेक्का कसैले नलिन आग्रह गरे ।
उनले देश विधिको शासनमार्फत अघि बढ्नुपर्नेमा जोड दिँदै आफ्नो पार्टी थिति बसाल्न आएको बताए । मजदुर, विद्यार्थी, शिक्षक र कर्मचारीलाई अनावश्यक भ्रममा नपर्न आग्रह गर्दै कुनै पनि सङ्गठन वा ट्रेड युनियन खारेज नहुने स्पष्ट पारे । उनले २०४६ सालपछि भएका सबै काण्डको छानबिन गर्ने प्रतिबद्धता व्यक्त गरे । प्रतिशोध नभई हिसाब हुने बताउँदै सहकारी, लघुवित्त लगायतका समस्यामा अल्झिएका साना बचतकर्ताको रकम रास्वपा नेतृत्वको सरकारले सय दिनभित्र फिर्ता गर्न सुरु गर्ने दाबी गरे ।
सुकुम्बासी बस्तीमा डोजर चल्ने भन्ने हल्ला निराधार रहेको उनको भनाइ छ । सुकुम्बासी समस्या समाधानका लागि विज्ञ र भूमिहीनको प्रतिनिधित्व हुने शक्तिशाली आयोग गठन गरी त्यसको सिफारिस कार्यान्वयन गरिने उनले बताए । डोजर भ्रष्टाचारीको महलमा चल्ने तर गरिबको झुपडीमा नचल्ने उनको भनाइ थियो ।
त्यसैगरी उनले शिक्षकहरूलाई स्मार्ट कक्षाकोठा निर्माण र गुणस्तरीय शिक्षामा केन्द्रित हुन आग्रह गरे । राजनीतिक जिम्मेवारी आफ्नो पार्टीले लिने भन्दै शिक्षा सुधारमा शिक्षकहरूको भूमिका निर्णायक हुने उल्लेख गरे ।
