प्रदर्शनमा भारतीय वायुसेनाका पाँच जनाको मृत्यु

एजेन्सी । दक्षिणी भारतीय सहर चेन्नाईमा भारतीय वायुसेना (आर्एएएफ) को प्रदर्शनमा गर्मी र कथित खराब भीड व्यवस्थापनका कारण पाँच जनाको मृत्यु भएको छ भने धेरैलाई अस्पतालमा भर्ना गरिएको छ ।

आईएएफको ९२औँ वार्षिकोत्सवको उपलक्ष्यमा आइतबार सहरको मरिना समुद्री तटमा आयोजित कार्यक्रममा कीर्तिमानी १५ लाख मानिसले भाग लिएका थिए । द्रविड मुन्नेत्र कझगमका सांसद कनिमोझी करुणानिधिले सोमबार भने, “आईएएफको प्रर्दशनपछि गर्मीका कारण पाँच जनाको मृत्यु भएको छ ।

पाँच जनाको मृत्युको खबर अत्यन्तै दुःखद् र पीडादायी छ ।” चेन्नाईको मरिना समुद्र तटमा आयोजित सैन्य उडान साहसिक कार्यक्रमको प्रत्यक्षदर्शी जनता भीड र चर्को गर्मीबाट पीडित थिए । अधिकतम तापक्रम ३५ डिग्री सेल्सियस पुगेको दिन आयोजित कार्यक्रममा दर्शकको क्षेत्रमा पिउने पानीको पर्याप्त व्यवस्था नभएको बताएको छ ।

स्थानीय सरकारका चिकित्सा तथा परिवार कल्याणमन्त्री सुब्रमण्यमले कार्यक्रममा खानेपानी आपूर्ति, चिकित्सा टोली र भीड नियन्त्रणका लागि सुरक्षा व्यवस्था मिलाइएको बताए ।