- १८ श्रावण २०८३, सोमबार / Aug 3, 2026
काठमाडौँ, १ बैशाख । अस्ट्रेलियाका वैज्ञानिकहरूले प्रकाशको प्रयोग गरेर अत्यन्त छिटो चार्ज हुने क्वान्टम ब्याट्रीको नमूना विकास गरेको दाबी गरेका छन्।
यस विकासलाई वैज्ञानिकहरूले ऊर्जा प्रविधिको क्षेत्रमा ठूलो प्रगतिका रूपमा लिएका छन्। आरएमआइटी विश्वविद्यालय, मेलबर्न विश्वविद्यालय र राष्ट्रमण्डल वैज्ञानिक तथा औद्योगिक अनुसन्धान सङ्गठन (सिएसआईआरओ) का वैज्ञानिकहरूले संयुक्त रूपमा यो ब्याट्री विकास गरेका हुन्।
परम्परागत ब्याट्रीहरूले रासायनिक प्रतिक्रियामार्फत ऊर्जा सञ्चय गर्ने गर्दछन् भने क्वान्टम ब्याट्रीले प्रकाश–पदार्थ अन्तरक्रिया प्रयोग गरेर ऊर्जा भण्डारण गर्ने भएकाले चार्ज गर्न लामो समय कुर्नु नपर्ने बताइएको छ। यस ब्याट्रीको अर्को विशेषता भनेको यसको आकार बढ्दै जाँदा चार्ज हुने गति पनि बढ्दै जानु हो, जुन परम्परागत ब्याट्रीमा सम्भव हुँदैन।
वैज्ञानिकहरूका अनुसार यस प्रविधिले भविष्यमा विद्युतीय गाडी, मोबाइल उपकरण तथा अन्य विद्युतीय सामग्रीहरूलाई बिना तार टाढाबाटै चार्ज गर्ने सम्भावना देखाएको छ। यो प्रविधि व्यावसायिक रूपमा सफल भएमा भविष्यमा ऊर्जा प्रयोग गर्ने तरिका नै पूर्ण रूपमा परिवर्तन हुन सक्ने वैज्ञानिकहरूको विश्वास छ।
