- २६ असार २०८३, शुक्रबार / Jul 10, 2026
काठमाडौं, १ बैशाख । सुदूरपश्चिम प्रदेशमा आज परम्परागत रूपमा मनाइने बिसु पर्व हर्षोल्लासका साथ मनाइँदैछ। यो पर्वका अवसरमा वर्षभरि देश तथा विदेशमा रहेका आफन्तजन घर फर्कने परम्परा रहेको छ।
बिसु पर्वमा नयाँ लुगा लगाउने, आफन्त तथा परिवारसँग भेला भएर मिठोमसिनो परिकार खाने तथा वर्षभरिका सुखदुःख साटासाट गर्ने चलन रहेको छ। पर्वका अवसरमा घरघरमा मासु, मालपुवा, खीर, पुरी, बटुक, माणालगायत मौलिक परिकारहरू तयार पारेर खाने गरिन्छ। बिहानैदेखि महिलाहरू घरायसी परिकार बनाउन व्यस्त रहने गर्छन्।
स्नानपछि देवदर्शन गरी परिवारका सदस्यहरू एकै ठाउँमा बसेर टिकोटालो गर्ने, मिलेर परिकार खाने र भलाकुसारी गर्ने परम्परा रहेको छ। बिसु पर्वको सबैभन्दा रोचक र मौलिक पक्ष भनेको ‘सिस्नु लगाउने’ चलन हो।
यस परम्पराअनुसार देवर–भाउजु, नन्द–भाउजु तथा साली–भिनाजुले एकापसमा सिस्नुपानी छ्यापेर पर्व मनाउने गर्दछन्। यदि देवर, नन्द, साली वा भिनाजु नभएमा आफैँले भए पनि शरीरमा सिस्नु लगाउने परम्परा रहेको छ।
बिसुका दिन सिस्नु लगाउँदा वर्षभरि शरीरमा रोग नलाग्ने जनविश्वास रहेको छ। शरीरमा सिस्नु लगाउँदा छालामा भएका खटिरा निको हुने तथा छालासम्बन्धी रोग हट्ने विश्वास पनि स्थानीयमा पाइन्छ।
