- १४ जेष्ठ २०८३, बिहीबार / May 28, 2026
काठमाण्डौं । सत्रौँ पुस्तकालय दिवस भव्यरुपले मनाइँदैछ । हरेक वर्ष भदौ १५ गते विभिन्न कार्यक्रम गरी देशभर पुस्तकालय दिवस मनाउने गरिन्छ तर पठन बानी भने बसाल्न थोरैले मात्रै सकेका छन् । यसवर्ष ‘निरन्तर शिक्षाका लागि पुस्तकालय’ नारा दिएर दिवस मनाइँदैछ ।
सरकारले २०६५ सालदेखि भदौ १५ गतेलाई पुस्तकालय दिवसका रुपमा मनाउँदै आएको छ । राजा गीर्वाणयुद्ध विक्रम शाहको शासनकालमा १८६९ साल भदौ १५ गते पुस्तकालय बनाउनेसम्बन्धी कानुनमा लालमोहर लगाएको स्मृतिमा पुस्तकालय दिवस मनाउने निर्णय गरेको थियो ।
सत्रौँ पुस्तकालय दिवसको अवसरमा दुई हप्ता अघिदेखि नै सरकारी एवम् गैरसरकारी स्तरबाट विभिन्न कार्यक्रम भइरहेको छ । पुस्तकालय दिवस मनाउन शिक्षा, विज्ञान तथा प्रविधि मन्त्रालयका सचिव डा.दीपक काफ्लेको संयोजकत्वमा मूल समारोह समिति पनि गठन गरेको छ ।
दिवसको मूल समारोहमा आज पुस्तकालय दिवससम्बन्धी स्मारिका सार्वजनिक गरिने जनाएको छ । कार्यक्रममा उत्कृष्ट पुस्तकालय र पाठकलाई पनि सम्मान गर्ने तयारी भइरहेको छ । शिक्षा मन्त्रालयको सर्वेक्षणमा देशभर नौ सय २८ वटा सामुदायिक तथा सार्वजनिक पुस्तकालय छन् ।
तीमध्ये अहिले दुई सय २७ वटा पुस्तकालयमात्र राम्रोसँग चलेको नेपाल सामुदायिक पुस्तकालय सङ्घले जनाएको छ । खुलेका सबै पुस्तकालयलाई राम्रोसँग चलाउनुपर्ने र आवश्यकता भएका अन्य ठाउँमा नयाँ खोल्न पनि प्रोत्साहन गर्ने नीति सरकारले लिनुपर्ने संघको जोड छ ।
