वैशाख १५ देखि रास्वपाको जिल्ला अधिवेशन

काठमाडौं, ६ वैशाख । राष्ट्रिय स्वतन्त्र पार्टी (रास्वपा) ले आगामी वैशाख १५ गतेदेखि देशभर जिल्ला अधिवेशन सुरु गर्ने निर्णय गरेको छ ।

आइतबार पार्टीको केन्द्रीय कार्यालयमा बसेको सचिवालय बैठकले जिल्ला अधिवेशन सञ्चालन गर्ने औपचारिक निर्णय गरेको हो। यसअघि नै सङ्गठन विभागको बैठकले अधिवेशनको कार्यतालिका तय गरिसकेको थियो । यस्तै, रास्वपाले प्रत्यक्ष निर्वाचित सांसद नभएका निर्वाचन क्षेत्रहरूमा समानुपातिक प्रणालीबाट निर्वाचित सांसदहरूलाई जिम्मेवारी दिने निर्णय पनि गरेको छ। सचिवालय बैठकले यस्तो निर्णय गर्दै संगठनलाई प्रभावकारी बनाउने रणनीति अघि सारेको हो ।

पार्टीका प्रवक्ता मनिष झाले जिल्ला तथा निर्वाचन क्षेत्र अनुसार जिम्मेवारी तोकिएको सूची भोलि बस्ने केन्द्रीय समितिको बैठकबाट अनुमोदन गरिने जानकारी दिए ।

रास्वपाले संगठन सुदृढीकरण र देशभर पार्टी संरचना विस्तार गर्ने लक्ष्यसहित यी निर्णयहरू लिएको जनाएको छ ।