रेडपाण्डाको अवस्था पहिचान गर्न म्याग्दीमा ‘क्यामेरा ट्यापिङ’ सुरु

दातृ निकाय टोलेडोजुको सहयोगमा जैविक विविधता संरक्षण समाज नेपाल (वायोकस नेपाल) ले जलजला, मुना, मरेनी र ढोरपाटन क्षेत्रमा ‘क्यामेरा ट्यापिङ’ विधिबाट रेडपाण्डाको अवस्था अध्ययन सुरु गरेको हो।

कार्यक्रम अधिकृत पवन राईका अनुसार रेडपाण्डाको आवतजावत हुने सम्भावित क्षेत्र र दिसा भेटिएका स्थानमा १२ वटा स्वचालित क्यामेरा जडान गरिएको छ।

क्यामेरामा कैद हुने तस्बिर तथा भिडियोका आधारमा रेडपाण्डाको अनुमानित सङ्ख्या पहिचान गर्न सहयोग पुग्ने अपेक्षा गरिएको छ। साथै, यस क्षेत्रमा रेडपाण्डाको स्वास्थ्य अवस्था र आन्द्रामा हुने परजीवीबारे पनि अध्ययन भइरहेको छ।

प्राविधिक टोलीले रेडपाण्डाको दिसा परीक्षणमार्फत स्वास्थ्य अवस्थाबारे विस्तृत अध्ययन गरिरहेको छ। यसअघि जलजलामा जडान गरिएका तीन क्यामेरामध्ये दुईवटामा रेडपाण्डा देखिएको थियो। सो क्षेत्रमा करिब ६ देखि २५ वटासम्म रेडपाण्डा बसोबास रहेको अनुमान गरिएको छ।

स्थानीयवासीले विभिन्न समयमा ढोरपाटन शिकार आरक्ष र आसपासका क्षेत्रमा रेडपाण्डा देखिएको तस्बिर तथा भिडियो सार्वजनिक गर्दै आएका छन्। रेडपाण्डा समुद्री सतहबाट २,२०० देखि ४,५०० मिटर उचाइमा बसोबास गर्ने गर्दछ र सरकारले यसलाई सङ्कटापन्न वन्यजन्तुको सूचीमा राखेको छ।

नेपालमा रेडपाण्डाको अनुमानित सङ्ख्या करिब ५०० देखि १,००० रहेको बताइएको छ। यो प्रजाति नेपाल, चीन, भारत, भुटान र म्यानमारमा मात्र पाइन्छ।