- २२ श्रावण २०८३, शुक्रबार / Aug 7, 2026
वीरगन्जमा पेट्रोलियम पदार्थ बोकेको ट्याङ्करबाट तेल चोरी गरी बिक्री गर्ने आरोपमा सात जना पक्राउ।
पेट्रोल पम्पका सञ्चालक, कर्मचारी तथा दुई ट्याङ्करका चालक–सहचालक पक्राउ परे।
प्रहरीले ट्याङ्करसहित घटनामा प्रयोग भएका सामग्री नियन्त्रणमा लिएर थप अनुसन्धान अघि बढाएको जनाएको छ।
पर्सा, २२ साउन । पर्साको वीरगन्ज महानगरपालिका–१४ स्थित बाइपास सडकखण्डमा पेट्रोलियम पदार्थ बोकेको ट्याङ्करबाट अनधिकृत रूपमा तेल चोरी गरी बिक्री–वितरण गर्ने कार्यमा संलग्न सात जनालाई प्रहरीले पक्राउ गरेको छ।
प्रहरीका अनुसार भारतबाट आईसीपी जाँचपास गरी नेपाल प्रवेश गरेको ना.७ ख १५३९ नम्बरको पेट्रोलियम पदार्थ बोकेको ट्याङ्करबाट बिहीबार साँझ करिब ५ः१० बजे तेल निकालिरहेको अवस्थामा उनीहरूलाई पक्राउ गरिएको हो।
वीरगन्ज–१४ स्थित सौदागर आयल सेन्टर परिसरमा ट्याङ्करमा जडान गरिएको सिललाई फलामको पाइपको हुक प्रयोग गरेर उचाली अनधिकृत रूपमा पेट्रोलियम पदार्थ निकालिरहेको अवस्थामा प्रहरी पुगेको थियो। घटनास्थलबाट ट्याङ्करसहित संलग्न व्यक्तिहरूलाई नियन्त्रणमा लिइएको प्रहरीले जनाएको छ।
पक्राउ पर्नेमा पेट्रोल पम्पका सञ्चालक, लेखापाल, क्यासियर तथा दुई ट्याङ्करका चालक र सहचालक रहेका छन्। पक्राउ परेकामध्ये तीन जना वीरगन्ज महानगरपालिकाका बासिन्दा हुन् भने चार जना मकवानपुरको हेटौँडा उपमहानगरपालिकाका रहेका छन्।
प्रहरीले घटनामा प्रयोग भएका ट्याङ्कर तथा अन्य सामग्री नियन्त्रणमा लिई पेट्रोलियम पदार्थ चोरी र अनधिकृत बिक्री–वितरण सम्बन्धी कसुरमा थप अनुसन्धान अघि बढाएको जनाएको छ। साथै, चोरी भएको तेलको परिमाण, संलग्न अन्य व्यक्तिको भूमिका तथा सम्भावित सञ्जालबारे पनि अनुसन्धान भइरहेको प्रहरीले जानकारी दिएको छ।
