- २८ भाद्र २०८३, आईतवार / Sep 13, 2026
काठमाडौं, ६ वैशाख । प्रधानमन्त्रीसँगको वार्ता निष्कर्षमा पुग्न नसकेपछि देशभरका शिक्षकहरूले आज पनि आन्दोलन जारी राख्ने भएका छन् । शुक्रबार राति अबेरसम्म भएको छलफलबाट कुनै ठोस सहमति नजुटेपछि उनीहरू रित्तो हात फर्किएका हुन् ।
शिक्षक महासंघका अध्यक्ष लक्ष्मीकिशोर सुवेदीका अनुसार राति ९ बजेदेखि ११ बजेसम्म प्रधानमन्त्री केपी शर्मा ओलीसँग, त्यसपछि सभामुख देवराज घिमिरेसँग पनि संवाद भएको थियो । प्रधानमन्त्रीले आफू सकारात्मक रहेको प्रतिक्रिया दिए पनि, शिक्षकहरू शिक्षा ऐन जारी नभएसम्म आन्दोलन नरोकिने अडानमा उभिए ।
सरकारले आउँदो वैशाख १२ गतेदेखि सुरु हुने संसदको बर्खे अधिवेशनमार्फत शिक्षा ऐन ल्याउने योजना बनाएको जनाए पनि शिक्षकहरूले स्पष्ट कानुनी आधार नआउँदासम्म विद्यालय नफर्किने बताए ।
शिक्षक महासंघले आज शनिबार पनि माइतीघर मण्डलामा दिउँसो १२ बजे प्रदर्शन गर्ने घोषणा गरेको छ। अध्यक्ष सुवेदीले समग्र परिस्थितिलाई हेर्दा तत्काल आन्दोलन स्थगन गर्न नसकिने स्पष्ट पारेका छन्।
शिक्षकहरूको लगातार आन्दोलनले कक्षा १२ को बोर्ड परीक्षामा समेत असर पर्नसक्ने देखिएको छ। तर, राष्ट्रिय परीक्षा बोर्डले हालसम्म परीक्षा सार्ने विषयमा कुनै निर्णय नगरेको बताएको छ।
