- १७ असार २०८३, बुधबार / Jul 1, 2026
काठमाडौं, ६ वैशाख । स्वास्थ्य सेवा विभागका अनुसार, आज र भोलि देशभरका ६ महिना देखि ५९ महिना उमेरका करीब २२ लाख बालबालिकालाई भिटामिन ‘ए’ क्याप्सुल र जुकाको औषधि खुवाइँदैछ।
यस अभियानअन्तर्गत एक वर्षदेखि पाँच वर्षसम्मका लगभग १९ लाख बालबालिकालाई जुकाको औषधि दिइनेछ। साथै, बालबालिकामा कुपोषणको परीक्षण पनि गरिनेछ।
‘राष्ट्रिय भिटामिन ‘ए’ कार्यक्रम’अन्तर्गत स्वास्थ्यकर्मी र ५२ हजार महिला स्वास्थ्य स्वयंसेविकाले १५ हजार स्वास्थ्यकर्मीको सहयोगमा यो कार्य सम्पादन गर्दैछन्। भिटामिन ‘ए’ को कमी रोक्न र उपचारका लागि २०५० सालमा आठ जिल्लाबाट सुरु भएको यो कार्यक्रम २०५९ सालदेखि देशभर लागू भएको हो। जुकाको औषधि खुवाउने कार्यक्रम २०६७ सालदेखि लागू गरिएको छ र बालभिटा खुवाउने कार्य २०६४ सालदेखि भइरहेको छ।
प्रत्येक वर्ष कात्तिक र वैशाख महिनामा सरकारद्वारा बालबालिकालाई भिटामिन ‘ए’ र जुकाको औषधि निःशुल्क खुवाउने व्यवस्था गरिएको छ। सरकारी तथ्यांक अनुसार, भिटामिन ‘ए’ को कमीका कारण नेपालमा प्रतिदिन एक बालबालिकाले आँखाको ज्योति गुमाउने समस्या भोगिरहेका छन्।
