- ३ भाद्र २०८३, बुधबार / Aug 19, 2026
पाल्पा, ३ भदौ । पाल्पाको तिनाउ गाउँपालिका–३ स्थित सिद्धबाबा सुरुङमार्ग नजिक पहिरो खसेपछि सिद्धार्थ राजमार्ग पूर्णरूपमा अवरुद्ध भएको छ।
बुधबार बिहान करिब ७ः३५ बजे सुरुङमार्गको पाल्पातर्फ प्रवेश गर्ने स्थानबाट करिब १०० मिटर उत्तरतर्फ सडक माथिबाट पहिरो खसेको जिल्ला प्रहरी कार्यालय पाल्पाले जनाएको छ।
सडक माथिबाट अझै निरन्तर पहिरो खसिरहेकाले तत्काल पहिरो पन्छाउने काम सुरु गर्न सकिएको छैन। पहिरो खस्न रोकिएपछि सडक खुलाउने काम सुरु गरिने प्रहरीले जनाएको छ। डोजर तयारी अवस्थामा राखिएको र बाटो खुलाउने पहल भइरहेको बताइएको छ।
घटनास्थलमा प्रहरी चौकी दोभानबाट प्रहरी सहायक निरीक्षकको कमाण्डमा ट्राफिक प्रहरीसहित पाँच जनाको टोली खटिएको छ।पहिरोका कारण सिद्धार्थ राजमार्गमा सवारी आवागमन पूर्ण रूपमा रोकिएको छ। यसबाट पाल्पा–बुटवलतर्फ आवतजावत गर्ने यात्रु तथा सवारीसाधन प्रभावित भएका छन्।
