- ३ भाद्र २०८३, बुधबार / Aug 19, 2026
एजेन्सी, ३ भदौ । सामाजिक सञ्जाल कम्पनी मेटाविरुद्ध बालबालिकालाई फेसबुक र इन्स्टाग्राममा आकर्षित गरेको आरोपमा अमेरिकामा अदालतको सुनुवाइ सुरु भएको छ।
क्यालिफोर्नियाको ओकल्याण्डस्थित अदालतमा मंगलबारदेखि सुरु भएको सुनुवाइमा विभिन्न अमेरिकी राज्यका सरकारी वकिल र मेटाका कानुनी प्रतिनिधिले आ–आफ्ना दाबी प्रस्तुत गरेका छन्। बीबीसीका अनुसार मुद्दाको सुनुवाइ करिब छ हप्तासम्म चल्नेछ।
क्यालिफोर्नियाका वकिलहरूले मेटालाई ११ र १२ वर्ष उमेरका लाखौँ बालबालिका इन्स्टाग्राममा रहेको जानकारी हुँदाहुँदै उनीहरूलाई सामाजिक सञ्जालबाट टाढा राख्न पर्याप्त कदम नचालेको आरोप लगाएका छन्। मेटाले भने त्यस्ता प्रयोगकर्ता १ लाखभन्दा बढी मात्र फेला परेको दाबी गर्दै सामाजिक सञ्जालको लतसम्बन्धी आरोप अस्वीकार गरेको छ।
सामाजिक सञ्जाल प्रयोग गर्ने धेरै किशोरकिशोरीले सकारात्मक अनुभवसमेत गरेको भन्दै राज्यका वकिलहरूले त्यसलाई बेवास्ता गरेको मेटाको तर्क छ। क्यालिफोर्निया र न्यूयोर्कसहित अमेरिकाका २९ राज्यले सन् २०२३ मा मेटाविरुद्ध मुद्दा दायर गरेका थिए।
ती राज्यहरूले मेटाले बालबालिकासम्बन्धी संघीय तथा राज्यका गोपनीयता कानुन उल्लङ्घन गरेको आरोप लगाएका छन्। राज्यहरूले मेटासँग अर्बौँ डलर क्षतिपूर्ति माग गर्नुका साथै फेसबुक र इन्स्टाग्राममा ‘लाइक’ संख्या देखाउने व्यवस्था हटाउन तथा प्रयोगकर्तालाई लगातार स्क्रोल गराइरहने प्रणालीमा परिवर्तन गर्न माग गरेका छन्।
