- २८ श्रावण २०८३, बिहीबार / Aug 13, 2026
नामची (सिक्किम) । भारतको सिक्किम राज्यस्थित नामची जिल्लाको समरडुङ क्षेत्रमा भीषण वर्षापछि गएको पहिरोले टिस्टा स्टेज–६ जलविद्युत् आयोजनाको निर्माणाधीन सुरुङ पुरिँदा कम्तीमा आठ जनाको मृत्यु भएको छ। दुर्घटनामा अन्य १९ जना मजदुर सुरुङभित्रै फसेको आशंका गरिएको छ।
प्रहरी उपरीक्षक सोनाम डोमा भोटियाका अनुसार हालसम्म आठ जनाको शव निकालिएको छ भने सुरुङभित्र फसेकाहरूको उद्धार कार्य निरन्तर जारी छ। लगातारको वर्षा, खराब मौसम र कठिन भूभागका कारण उद्धार अभियानमा चुनौती थपिएको उनले बताए।
प्रारम्भिक उद्धार प्रयासका क्रममा सुरुङभित्र प्रवेश गरेका तीन जनामध्ये दुई जना बाहिर निस्कन नसकेको जनाइएको छ। सुरुङभित्र करिब तीन किलोमिटर गहिराइसम्म मजदुरहरू फसेको आशंका गरिएकाले उद्धार कार्य जटिल बनेको छ।
जिल्ला अधिकारी अनुपा ताम्लिङका अनुसार घटनाका बेला निजी निर्माण कम्पनीका १९ जना र एनएचपीसीका ६ जना मजदुर घटनास्थलमा कार्यरत थिए। उक्त सुरुङ एनएचपीसीको टिस्टा स्टेज–६ जलविद्युत् आयोजनाअन्तर्गत निर्माण भइरहेको हो।
सिक्किमका मुख्यमन्त्री प्रेमसिंह तामाङ–गोलेले घटनाप्रति गहिरो दुःख व्यक्त गर्दै मृतकका परिवारप्रति समवेदना प्रकट गरेका छन्।
उनले जिल्ला प्रशासन, प्रहरी, राज्य आपत्कालीन प्रतिक्रिया बल (एसडीआरएफ), अग्निनियन्त्रक सेवा तथा राष्ट्रिय आपत्कालीन प्रतिक्रिया बल (एनडीआरएफ) का टोलीहरू घटनास्थलमा परिचालित भई उद्धार कार्यलाई तीव्र बनाइरहेको जानकारी दिएका छन्।
उद्धार टोलीले मौसम अनुकूल हुनेबित्तिकै सुरुङभित्र फसेकाहरूको सकुशल उद्धारका लागि प्रयास जारी राखेको जनाएको छ।
