- २४ असार २०८३, बुधबार / Jul 8, 2026
बाँके, २५ बैशाख । राष्ट्रिय गौरवको सिक्टा सिँचाइ आयोजनाअन्तर्गत डुडुवा शाखा नहर निर्माणकार्य द्रुतगतिमा अघि बढाइएको छ । आयोजनाको पश्चिमी मूल नहरअन्तर्गत निर्माण भइरहेको २३.४ किलोमिटर लामो डुडुवा शाखा नहरबाट करिब १६ हजार हेक्टर जमिनमा बाह्रैमास सिँचाइ सुविधा पुर्याउने लक्ष्य रहेको आयोजना कार्यालयले जनाएको छ ।
सिक्टा सिँचाइ आयोजनाका सूचना अधिकारी तथा सिनियर डिभिजनल इन्जिनियर मनोजकुमार साहका अनुसार नहरअन्तर्गत खजुरा र मानपुर दुई मुख्य शाखा रहनेछन् । विगतमा ठेक्का विवादका कारण रोकिएको निर्माणकार्य पुरानो ठेक्का रद्द गरी नयाँ कम्पनीमार्फत अघि बढाइएको हो । हालसम्म नहर निर्माणको करिब २५ प्रतिशत प्रगति भएको छ ।
नेपालगन्ज–सुर्खेत सडकखण्डको पिप्रहवादेखि राँझासम्म करिब पाँच किलोमिटर क्षेत्रमा टनेलमार्फत नहर निर्माण गरिनेछ भने बाँकी भाग खुला संरचनामा बन्नेछ । रामेछाप शेर्पा कन्स्ट्रक्सन प्रालिले एक अर्ब १२ करोड रुपैयाँ लागतमा तीन वर्षभित्र निर्माण सम्पन्न गर्ने जिम्मा पाएको छ ।
आयोजनाअनुसार मूल नहरबाट १८ क्युमेक्स पानी डुडुवा शाखा नहरमा प्रवाह गरिनेछ । नहर निर्माण सम्पन्न भएपछि बाँकेको नेपालगन्ज, जानकी, खजुरा र डुडुवा गाउँपालिकाका किसानले वर्षैभरि सिँचाइ सुविधा पाउने अपेक्षा गरिएको छ ।
