- १५ जेष्ठ २०८३, शुक्रबार / May 29, 2026
काठमाडौं, २६ असोज। चीनले अमेरिकामाथि व्यापार तनाव बढाएको आरोप लगाएको छ। अमेरिकी राष्ट्रपति डोनाल्ड ट्रम्पले चिनियाँ सामानमा थप कर लगाउने घोषणा गरेपछि चीनले यसलाई ‘पाखण्डी र दोहोरो मापदण्ड’ भन्दै कडा प्रतिक्रिया दिएको हो।
समाचार संस्था रोयटर्सका अनुसार, चीनले हालै दुर्लभ खनिज तत्व र उपकरणहरूको निर्यातमा लगाइएको प्रतिबन्धको बचाउ गरेको छ। यद्यपि, अमेरिकी उत्पादनहरूमा नयाँ कर लगाउने कदमबाट भने चीन पछाडि हटेको समाचारमा उल्लेख गरिएको छ।
अमेरिकाको पछिल्लो कर निर्णयपछि राष्ट्रपति ट्रम्पले नोभेम्बर १ सम्ममा चीनबाट आउने सामानमा १०० प्रतिशतसम्म भन्सार शुल्क लगाउने चेतावनी दिएका थिए। साथै, अमेरिकाले महत्त्वपूर्ण सफ्टवेयर र प्रविधिमा निर्यात नियन्त्रण पनि थपेको छ। त्यसैगरी, ट्रम्पले एशिया–प्यासिफिक आर्थिक सहयोग (APEC) शिखर सम्मेलनमा चिनियाँ राष्ट्रपति सी जिनपिङसँग हुने प्रस्तावित भेट रद्द गर्ने चेतावनी समेत दिएका छन्।
आज चीनको वाणिज्य मन्त्रालयले विज्ञप्ति जारी गर्दै ट्रम्प प्रशासनको नीति ‘आर्थिक दबाबको राजनीति’ भएको बताएको छ। मन्त्रालयले अमेरिकाले सेप्टेम्बरदेखि चीनमाथि उच्च कर र प्रतिबन्ध लगाउँदै आएको स्मरण गर्दै यस्तो कदमले संवाद र समाधानलाई झन् जटिल बनाएको जनाएको छ।
दुर्लभ खनिज तत्वहरू अहिले दुई महाशक्तिबीचको व्यापारिक विवादको केन्द्र बनेका छन्। यी तत्त्वहरू स्मार्टफोन, विद्युतीय गाडी, सैन्य उपकरण र नवीकरणीय ऊर्जा प्रविधिका लागि अत्यावश्यक मानिन्छन्। चीन विश्व बजारमा यस्ता खनिजहरूको सबैभन्दा ठूलो उत्पादक र प्रशोधक हो।
गत बिहीवार चीनले महत्त्वपूर्ण खनिज उत्खनन र प्रशोधन प्रविधिमा नयाँ निर्यात प्रतिबन्ध घोषणा गरेको थियो। त्यसपछि, शुक्रबार चीनले ‘रक्षात्मक कदम’ भन्दै अमेरिकन जहाजहरूमा ‘विशेष बन्दरगाह शुल्क’ लागू गर्ने घोषणा गरेको छ। चीनले यो कदमलाई अमेरिकाले आफ्ना जहाजहरूमा लगाएको बन्दरगाह शुल्कको प्रतिकारात्मक प्रतिक्रिया भएको बताएको छ।
