- २३ बैशाख २०८३, बुधबार / May 6, 2026
स्मार्ट टेलिकमका सञ्चालक सर्वेश जोशी पक्राउ
सीआईबीद्वारा ठगी र आपराधिक विश्वासघातको आरोपमा कारबाही
खुर्सानीटार काठमाडौँबाट पक्राउ
अनुमति नवीकरण नगरेपछि कम्पनीको लाइसेन्स रद्द भएको थियो
थप अनुसन्धान जारी
काठमाडौँ, २२ बैशाख । नेपाल प्रहरी अन्तर्गतको केन्द्रीय अनुसन्धान ब्यूरो (सीआईबी) ले स्मार्ट टेलिकमका सञ्चालक सर्वेश जोशीलाई पक्राउ गरेको छ।
सीआईबीका अनुसार उनलाई ठगी तथा आपराधिक विश्वासघात सम्बन्धी कसूरमा सोमबार काठमाडौँको खुर्सानीटारबाट पक्राउ गरिएको हो। स्मार्ट टेलिकम प्रा.लि. ले नेपाल दूरसञ्चार प्राधिकरणबाट २०७० वैशाख २ गते आधारभूत टेलिफोन सेवा सञ्चालन गर्न अनुमति प्राप्त गरेको थियो।
तर कम्पनीले समयमै अनुमति नवीकरण नगरेपछि दूरसञ्चार ऐन, २०५३ को दफा २५(५) अनुसार २०८० वैशाख ३ गते अनुमति स्वतः रद्द भएको थियो। अनुमति रद्द भएपछि प्राधिकरणले सम्पत्ति व्यवस्थापन नियमावली, २०७९ अनुसार कम्पनीका दूरसञ्चार पूर्वाधार, संरचना र सञ्जाल नियन्त्रणमा लिएको थियो।
तर त्यसपछि पनि नेपाल सरकारको सम्पत्तिमा अनधिकृत दाबी गर्दै ठगी तथा आपराधिक विश्वासघात गरेको आरोप जोशीमाथि लागेको प्रहरीले जनाएको छ। उनीविरुद्ध काठमाडौँ जिल्ला अदालतबाट पक्राउ अनुमति लिएर अनुसन्धान अघि बढाइएको सीआईबीले जानकारी दिएको छ।
