- २६ असार २०८३, शुक्रबार / Jul 10, 2026
भक्तपुर, ३० वैशाख। नेपाल मजदुर किसान पार्टीका केन्द्रीय सचिव तथा प्रतिनिधिसभाका सांसद प्रेम सुवालले देशको सार्वभौमिकता कमजोर हुँदा अन्तर्राष्ट्रिय समुदायमा नेपाली नागरिकको प्रतिष्ठा गुम्ने खतरा बढ्ने बताउनुभएको छ।
भक्तपुर नगरपालिकाबाट सञ्चालित ख्वप अस्पतालमा कार्यरत चिकित्सकहरूसँगको भेटघाट तथा मार्गनिर्देशन कार्यक्रममा बोल्दै सांसद सुवालले वर्तमान शासक दलका गलत क्रियाकलाप र व्यापक भ्रष्टाचारका कारण अन्तर्राष्ट्रिय स्तरमा नेपालको छवि कमजोर बनेको टिप्पणी गर्नुभयो।
उहाँले भन्नुभयो, “नेपाल सरकार स्वयंले गौतम बुद्धको जन्म नेपालमा भएको विषयमा ऐतिहासिक प्रमाणसहित अन्तर्राष्ट्रिय जगतमा स्पष्ट रूपमा प्रस्तुत नगर्दा बुद्ध भारतमा जन्मिएको भन्ने गलत प्रचार अझै भइरहेकै छ। यसबारे सरकारले तुरुन्तै पहल गर्नुपर्छ।”
सांसद सुवालले शिक्षा र स्वास्थ्य सेवालाई नागरिकको नैसर्गिक अधिकार मान्नुपर्नेमा जोड दिँदै, नेपालमा सबैभन्दा महँगो सेवा नै स्वास्थ्य उपचार भएको बताउनुभयो। उहाँले चिकित्सकहरूले भोगिरहेका समस्याबारे समाधानका लागि संसदमा आवाज उठाउने प्रतिबद्धता व्यक्त गर्नुभयो।
भक्तपुर नगरपालिकाले पञ्चायतकालदेखि नै जनस्वास्थ्य केन्द्र स्थापना गरी सेवा दिन थालेको इतिहासलाई स्मरण गर्दै, ख्वप अस्पतालको विकास यात्रालाई महत्वपूर्ण उपलब्धि भन्दै सुवालले प्रारम्भदेखि सेवा दिने अग्रज चिकित्सकहरूको नाम अभिलेखमा राख्नुपर्ने र हाल कार्यरत चिकित्सकलाई नियमित अभिमुखीकरण तालिम दिनुपर्ने सुझाव दिनुभयो।
कार्यक्रममा भक्तपुर नगरपालिकाका प्रमुख तथा ख्वप अस्पताल सञ्चालक समितिका अध्यक्ष सुनिल प्रजापतिले भक्तपुरलाई स्वास्थ्य उपचार सेवाको राष्ट्रिय गन्तव्य बनाउने लक्ष्य रहेको स्पष्ट पार्नुभयो। उहाँले भन्नुभयो, “नेपाल मजदुर किसान पार्टीको समाजवादी मार्गदर्शनमा ख्वप अस्पताललाई जनताको अस्पताल बनाउने प्रयास हुँदैछ। अस्पतालले ३६५ दिन बिहान ७ बजेदेखि बेलुकी ६ बजेसम्म सेवा दिँदै आएको छ।”
निःशुल्क अक्सिजन तथा रगत सेवा, घरदैलो नर्स सेवा, र समुदायस्तरमा सञ्चालन गरिने स्वास्थ्य शिविरहरू ख्वप अस्पतालका विशेष सेवाहरू भएको उहाँले जानकारी दिनुभयो।
कार्यक्रममा अस्पताल सञ्चालक समितिका सदस्य रविन्द्र ज्याख्व, नि. मेडिकल डाइरेक्टर डा. मजेशप्रताप मल्ल, र डा. रत्नसुन्दर लासिवाले पनि स्वास्थ्य सेवाको सुधारका पक्षमा विचार राख्नुभएको थियो।
