- २८ बैशाख २०८३, सोमबार / May 11, 2026
एजेन्सी । अमेरिकाको टेक्सास राज्यमा आएको विनाशकारी बाढीले अहिलेसम्म ४३ जनाको ज्यान गएको पुष्टि भएको छ । जसमध्ये १५ जना बालबालिका छन् । स्थानीय अधिकारीहरूका अनुसार अझै २७ बालबालिका बेपत्ता छन् ।
बेपत्ता भएका बालबालिका ग्वाडालुप नदी किनारमा रहेको एक क्रिश्चियन युवा क्याम्पमा सहभागी थिए । नदीमा आएको भीषण बाढीले क्याम्प बगाउँदा उनीहरू सम्पर्कविहीन भएका हुन् । प्रारम्भिक जानकारी अनुसार हालसम्म करिब ८५० जनाको उद्धार गरिएको छ ।
जोखिम कायमै रहेको भन्दै आगामी हप्तासम्म बाढीको प्रभाव रहन सक्ने चेतावनी जारी गरिएको छ । टेक्सासका गभर्नर ग्रेग एबटले राहत तथा उद्धार कार्य तीव्र गतिमा अघि बढिरहेको जानकारी दिएका छन् ।
ग्वाडालुप नदीमा पानीको सतह २५ फिटभन्दा माथि पुगेपछि बालबालिका भएको क्याम्प पूर्ण रूपमा बगेको बताइएको छ । संघीय सरकारको सहयोगमा कोष्ट गार्डलाई उद्धार तथा खोजी कार्यमा परिचालन गर्ने तयारी भइरहेको छ ।
