- २३ असार २०८३, मंगलवार / Jul 7, 2026
टीकापुर प्रहरी हिरासतबाट लागूऔषध मुद्दाका थुनुवा फरार।
डीएसपी योगेन्द्र तिमिल्सिनाको संयोजकत्वमा पाँच सदस्यीय छानबिन समिति गठन।
ड्युटीमा रहेका प्रहरी जवान ललि भण्डारी निलम्बित।
फरार थुनुवाको खोजीका लागि प्रहरी परिचालन।
घटनाबारे विस्तृत अनुसन्धान जारी।
धनगढी, २३ असार । कैलालीको टीकापुरस्थित इलाका प्रहरी कार्यालयको हिरासतबाट लागूऔषध मुद्दाका एक थुनुवा फरार भएको घटनाको छानबिन गर्न पाँच सदस्यीय समिति गठन गरिएको छ।
जिल्ला प्रहरी कार्यालय कैलालीका प्रवक्ता तथा प्रहरी नायब उपरीक्षक (डीएसपी) योगेन्द्र तिमिल्सिनाका अनुसार घटनाको सत्यतथ्य पत्ता लगाउन उनकै संयोजकत्वमा पाँच सदस्यीय छानबिन समिति गठन गरिएको हो।
घटनापछि ड्युटीमा रहेका प्रहरी जवान ललि भण्डारीलाई निलम्बन गरिएको प्रहरीले जनाएको छ। फरार हुने थुनुवा टीकापुर नगरपालिका–१ निवासी ३१ वर्षीय संजय नगार्जी हुन्। प्रहरीका अनुसार उनी आइतबार राति पानी खाने बहानामा हिरासतबाट बाहिर निस्कने क्रममा ड्युटीमा रहेका प्रहरीलाई धकेल्दै फरार भएका थिए।
नगार्जी असार ९ गते लागूऔषध मुद्दामा पक्राउ परेका थिए। फरार भएपछि उनको खोजीका लागि विभिन्न प्रहरी टोली परिचालन गरिएको जिल्ला प्रहरी कार्यालय कैलालीले जनाएको छ।
प्रहरीले घटनाको विस्तृत अनुसन्धान जारी रहेको र फरार थुनुवालाई पक्राउ गर्न खोजी अभियानलाई तीव्र बनाइएको जनाएको छ।
