- १७ जेष्ठ २०८३, आईतवार / May 31, 2026
काठमाडौँ, २८ वैशाख । टर्किस एयरलाइन्सको जहाज अवतरणका क्रममा टायर विस्फोट भई आगो निस्किएपछि अवरुद्ध भएको त्रिभुवन अन्तर्राष्ट्रिय विमानस्थल पुनः सञ्चालनमा आएको छ ।
इस्तानबुलबाट सोमबार बिहान काठमाडौँ आएको टर्किस एयरलाइन्सको टीके–७२६ कल साइनको विमान अवतरण गर्ने क्रममा एउटा टायर विस्फोट हुँदा पांग्राको भागमा आगो र धुवाँ निस्किएको थियो । आगो देखिएसँगै सुरक्षाका कारण विमानस्थलमा सबै उडान र अवतरण अस्थायी रूपमा रोकिएको थियो ।
घटनापछि विमानस्थल प्रशासन र चालक दलले सतर्कता अपनाउँदै यात्रुहरूलाई ढोकाबाट नभई आकस्मिक उद्धार स्लाइड प्रयोग गरी सुरक्षित रूपमा बाहिर निकालेका थिए । जहाजमा चार बालबालिकासहित २७७ यात्रु सवार थिए । सबै यात्रु पूर्ण रूपमा सुरक्षित रहेको नेपाल नागरिक उड्डयन प्राधिकरण ले जनाएको छ ।
विमानस्थल ठप्प हुँदा केही अन्तर्राष्ट्रिय उडानहरू आकाशमै फन्का लगाउन बाध्य भएका थिए । विमानस्थल स्रोतका अनुसार एयर अरेबियाको जहाजले आकाशमा करिब नौ फन्का लगाएको थियो । यस्तै, फ्लाइ दुबई, एयर इन्डिया, कतार एयरवेज र नेपाल एयरलाइन्सका जहाजहरूले पनि आकाशमै प्रतीक्षा गर्नुपरेको थियो ।
टायर विस्फोट भएको टर्किस एयरलाइन्सको जहाजलाई पछि रनवेबाट हटाई सुरक्षित रूपमा पार्किङ क्षेत्रमा सारिएको विमानस्थल प्रशासनले जनाएको छ । जहाज हटाइएपछि रनवे परीक्षण गरिएको र अवस्था सामान्य बनेपछि विमानस्थल पुनः सञ्चालनमा ल्याइएको हो ।
विमानस्थल स्रोतका अनुसार हाल उडान र अवतरण नियमित रूपमा सुरु भइसकेको छ । घटनाको प्राविधिक कारणबारे थप जाँच भइरहेको सम्बन्धित निकायले जनाएको छ ।
