किम जोङको हत्या भए स्वतः आणविक हमला

एजेन्सी । उत्तर कोरियाले आफ्नो संविधानमा संशोधन गर्दै यदि सर्वोच्च नेता किम जोङको हत्या भए वा देशको नेतृत्व प्रणाली असक्षम बनेमा स्वतः आणविक हमला गर्ने व्यवस्था गरेको छ ।

अमेरिकी सञ्चारमाध्यम फक्स न्युज डिजिटलले बेलायती पत्रिका द टेलिग्राफको रिपोर्ट उद्धृत गर्दै उत्तर कोरियाले यस्तो संवैधानिक परिवर्तन गरेको जनाएको हो । पछिल्लो समय विश्वभर बढ्दो सैन्य र राजनीतिक तनावका बीच उत्तर कोरियाले आफ्नो आणविक नीति थप कडा बनाएको बताइएको छ ।

रिपोर्टअनुसार इरानका सर्वोच्च नेता अली खामेनी र अन्य उच्च अधिकारीहरूको हत्या भएको घटनापछि विश्व राजनीति झन् संवेदनशील बन्दै गएको अवस्थामा उत्तर कोरियाले आफ्नो सुरक्षा रणनीति संविधानमै समेटेको हो ।

उत्तर कोरियाको सर्वोच्च जनपरिषद्को मार्च २२ देखि प्योङयाङमा सुरु भएको अधिवेशनले यो संवैधानिक संशोधन अनुमोदन गरेको जनाइएको छ । दक्षिण कोरियाको राष्ट्रिय गुप्तचर निकायले पनि यसबारे हालै सरकारका वरिष्ठ अधिकारीहरूलाई जानकारी गराएको उल्लेख गरिएको छ ।

संशोधित प्रावधानमा भनिएको छ, ‘यदि राज्यको आणविक बलमाथिको कमान्ड तथा नियन्त्रण प्रणाली शत्रु शक्तिहरूको आक्रमणका कारण खतरामा परेमा तत्काल र स्वचालित रूपमा आणविक हमला सुरु गरिनेछ ।’

यसअघि उत्तर कोरियाले संविधान संशोधन गर्दै दक्षिण कोरियासँगको सीमालाई स्पष्ट रूपमा परिभाषित गर्नुका साथै दुई देशबीचको एकीकरण (रियुनिफिकेसन) सम्बन्धी उल्लेखहरू हटाएको थियो । संविधानमा सीमा समावेश गरिएको यो पहिलोपटक भएको बताइएको छ ।

गत महिना किम जोङले दक्षिण कोरियालाई सबैभन्दा शत्रुतापूर्ण राज्यको संज्ञा दिँदै देशको आणविक क्षमतालाई थप मजबुत बनाउने प्रतिबद्धता जनाएका थिए । उनले अमेरिकामाथि पनि राज्य आतंकवाद र आक्रामकताको आरोप लगाउँदै बदलिँदो विश्व राजनीतिक परिस्थितिमा उत्तर कोरियाले अझ सक्रिय भूमिका खेल्न सक्ने संकेत दिएका छन् ।