- २७ श्रावण २०८३, बुधबार / Aug 12, 2026
काठमाडौँ, ३१ बैशाख । नुवाकोटको बेलकोटगढी नगरपालिका–७ स्थित कचौडे भीर नजिक त्रिशुली नदीमा नुहाउने क्रममा दुई जना बालिका बेपत्ता भएका छन्।बेपत्ता हुनेमा ११ वर्षीया जेनी डंगोल र ११ वर्षकै सदिक्षा राई रहेको जिल्ला प्रहरी कार्यालय, नुवाकोटले जनाएको छ। घटना मंगलबार साँझपख भएको बताइएको छ।
ती दुई बालिका आफ्ना साथीसहित नदीमा नुहाउन गएकाे प्रहरीले जनाएकाे छ । नुहाउने क्रममा त्रिशुलीको तीव्र बहावमा परेर उनीहरू बेपत्ता भएका हुन्। घटनापछि खोजी कार्यका लागि सशस्त्र प्रहरी बलको विपद् व्यवस्थापन तालिम प्राप्त टोली खटाइएको छ। खोज कार्य मंगलबार साभफदेखि नै सुरु गरिएको थियो भने बुधबार बिहानैदेखि पुनः जारी राखिएको सशस्त्र प्रहरी बलले जनाएकाे छ ।
हालसम्म बालिकाहरूको अवस्था अज्ञात छ। स्थानीय बासिन्दा, नेपाल प्रहरी र सशस्त्र प्रहरीको टोलीको सहकार्यमा नदी किनार तथा आसपासका क्षेत्रमा तीव्र खोजी कार्य जारी छ। प्रहरीले बालबालिका नदी, पोखरी जस्ता जलस्रोतमा अभिभावकको निगरानीबिना जानु खतरनाक हुने भन्दै सचेत रहन आम सर्वसाधारणलाई अनुरोध गरेको छ।
