- १० बैशाख २०८३, बिहीबार / Apr 23, 2026
एजेन्सी । अमेरिकी राष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनसँग आफू निकै रिसाएको र दुखी भएको खुलासा गरेका छन्। एनबीसी न्यूजसँगको फोन अन्तर्वार्तामा ट्रम्पले पुटिनले युक्रेनी राष्ट्रपति भोलोदिमिर जेलेन्स्कीको विश्वसनीयतामाथि आक्रमण गरेकोमा असन्तुष्टि व्यक्त गरे।
ट्रम्पले युक्रेन युद्धविराममा पुटिन सहमत नभए रूसबाट तेल आयात गर्ने देशहरूमाथि ५० प्रतिशत कर लगाउने चेतावनी दिए। उनले भने, “यदि रूस र म युक्रेनमा रक्तपात रोक्न सम्झौतामा पुग्न सकेनौँ भने, म रूसको तेलमा थप कर लगाउनेछु। यो रूसको गल्ती हो भन्ने मलाई लाग्छ।”
एनबीसीका अनुसार, १० मिनेटको अन्तर्वार्तामा ट्रम्पले पुटिनको जेलेन्स्कीप्रतिको आलोचनाबाट आफू आहत भएको बताए। तर, ट्रम्पले यसअघि जेलेन्स्कीलाई तानाशाह भन्दै चुनाव गराउन दबाब दिएका थिए। अमेरिकी राष्ट्रपति कार्यालयले यसबारे कुनै प्रतिक्रिया दिएको छैन। यता, युरोपेली नेताहरू ट्रम्प र पुटिनबीचको निकटताबाट चिन्तित छन्।
