- ३० श्रावण २०८३, शनिबार / Aug 15, 2026
वासिङ्टन, २९ असार । अमेरिकी राष्ट्रपति डोनाल्ड ट्रम्पले युरोपेली सङ्घ (EU) र मेक्सिकोलाई लक्षित गर्दै आगामी अगस्ट १ देखि ३० प्रतिशत आयात कर लगाइने घोषणा गरेका छन्। ट्रम्पको यो घोषणाले ट्रान्सएटलान्टिक व्यापार सम्बन्धमा नयाँ तनाव सिर्जना गरेको छ।
जर्मनीको प्रमुख उद्योग निकाय जर्मन इन्डस्ट्रिज फेडेरेसन (BDI) ले शनिवार विज्ञप्ति जारी गर्दै वासिङ्टन र युरोपेली सङ्घलाई तीव्र रुपमा समाधान खोज्न आग्रह गरेको छ। विज्ञप्तिमा ट्रम्पको घोषणा दुवै पक्षका उद्योगहरूका लागि चेतावनी सरह रहेको उल्लेख गरिएको छ।
बीडीआईका वरिष्ठ अधिकारी वुल्फगांग निडरमार्कले अमेरिकासँगको व्यापारिक तनावले आर्थिक पुनरुत्थान, नवप्रवर्तन र अन्तर्राष्ट्रिय सहकार्यप्रति विश्वासमा गम्भीर आघात पुग्ने बताएका छन्।
बीडीआईले जर्मन सरकार, युरोपेली आयोग र अमेरिकी प्रशासनबीच तात्कालिक संवाद र सहमति आवश्यक भएकोमा जोड दिएको छ। उल्लेखनीय छ, अमेरिका जर्मनीको सबैभन्दा ठूलो व्यापारिक साझेदार हो।
ट्रम्पले यसअघि नै २० भन्दा बढी साझेदार राष्ट्रहरूलाई पत्र पठाउँदै नयाँ कर नीति सम्बन्धी चेतावनी दिइसकेका छन्। उनले युरोपेली सङ्घसँगको व्यापार घाटा न्यूनीकरण गर्न नयाँ कर नीति अवलम्बन गरिने संकेत दिएका छन्।
