मुख्य बुँदा
अमेरिकी राष्ट्रपति डोनाल्ड ट्रम्पले इरानबाट सेना २–३ हप्तामा फिर्ता गर्ने घोषणा।
सैन्य अपरेशन अन्तिम चरणमा पुगेको दाबी।
वार्ता र सैन्य कारबाही समानान्तर रूपमा जारी।
अमेरिका बाहिरिएपछि तेलको मूल्य घट्ने ट्रम्पको भनाइ।
इरानबाट अमेरिकी कम्पनीलाई ठूलो खतरा नरहेको दाबी।
भविष्यमा परमाणु हतियार बनाउने प्रयास भए कडा कारबाही गर्ने चेतावनी।
एजेन्सी, १८ चैत्र । पश्चिम एसियामा जारी युद्ध ३३औँ दिनमा प्रवेश गरिरहेका बेला अमेरिकी राष्ट्रपति डोनाल्ड ट्रम्पले इरानमा सञ्चालन भइरहेको सैन्य अपरेशन दुईदेखि तीन हप्ताभित्र समाप्त गरी अमेरिकी सेना फिर्ता गर्ने घोषणा गरेका छन्।
ह्वाइट हाउसमा आयोजित कार्यक्रममा ट्रम्पले इरानसँग वार्ताका प्रयाससँगै सैन्य कारबाही पनि जारी रहेको बताए। उनले अमेरिका इरानबाट बाहिरिएपछि स्थिति सुधार हुने र विश्व बजारमा तेलको मूल्य घट्न सक्ने उल्लेख गरे।
ट्रम्पले अमेरिकी सेनाले आफ्नो मुख्य उद्देश्य लगभग पूरा गरिसकेको दाबी गर्दै आगामी दुई हप्ताभित्र अपरेशन समाप्त गर्ने योजना रहेको बताए। साथै, इरानबाट अमेरिकी कम्पनीहरूलाई ठूलो खतरा नरहेको र इरानले थप आक्रमण नगर्ने विश्वास व्यक्त गरे।
उनले इरानसँग परमाणु हतियार नभएको र निकट भविष्यमा त्यस्तो क्षमता विकास गर्न नसक्ने दाबीसमेत गरे। ट्रम्पका अनुसार अमेरिकाको मुख्य उद्देश्य इरानलाई लामो समयसम्म परमाणु हतियार विकास गर्न नदिनु हो।
उनले चेतावनी दिँदै भविष्यमा इरानले पुनः परमाणु हतियार बनाउन प्रयास गरे कडा कारबाही गर्ने बताएका छन्। साथै, हालको इरानी नेतृत्व पहिलेको भन्दा कम कट्टर र वार्ताका लागि तयार रहेको टिप्पणी पनि गरेका छन्।
