- २६ असार २०८३, शुक्रबार / Jul 10, 2026
उदयपुर, ७ बैशाख । चौदण्डीगढी नगरपालिका मा छिमेकीबीचको सामान्य विवादले उग्र रूप लिँदा एक जनाको ज्यान गएको छ।आइतबार साँझ वडा नं. ७ सीता पाइला टोलमा ७३ वर्षीय राम प्रसाद राई ले धारिलो हतियार प्रहार गर्दा ६४ वर्षीय माहाशेर राई को मृत्यु भएको हो।
घटना विवरण अनुसार आइतबार साँझ करिब सवा ८ बजे राम प्रसाद राई र माहाशेर राईबीच छरछिमेक सम्बन्धी विषयमा विवाद भएको थियो। विवादका क्रममा आवेगमा आएका राम प्रसादले माहाशेरमाथि धारिलो हतियार प्रहार गरेका थिए। हतियार प्रहारबाट माहाशेरको छातीको दायाँपट्टिको माथिल्लो भागमा गहिरो चोट लागेको थियो।
घाइते माहाशेरलाई तत्काल उपचारका लागि नगर अस्पताल बेल्टार लगिएको थियो। तर अस्पताल पुऱ्याउनासाथ चिकित्सकले उनलाई मृत घोषणा गरेका थिए। प्रहरीका अनुसार अस्पताल लैजाँदै गर्दा बाटोमै उनको मृत्यु भइसकेको थियो।
हत्यामा संलग्न राम प्रसाद राईलाई इलाका प्रहरी कार्यालय बेल्टार बाट खटिएको प्रहरी टोलीले नियन्त्रणमा लिएको छ। प्रहरी निरीक्षक प्रभात लक्सम लिम्बू को कमाण्डमा खटिएको टोलीले उनलाई नियन्त्रणमा लिएर थप अनुसन्धान अघि बढाएको जनाएको छ।
