- ३० असार २०८३, मंगलवार / Jul 14, 2026
एजेन्सी । अमेरिकी सेनाले भेनेजुएलाको तट नजिक रहेको एक विशाल तेल ट्यांकर नियन्त्रणमा लिएको छ।
यो कदमले अमेरिकाले भेनेजुएलाका राष्ट्रपति निकोलेस मदुरो नेतृत्वको सरकारमाथि थप कडा दबाब बनाएको संकेत गरेको अन्तर्राष्ट्रिय समाचार संस्था बीबीसीले जनाएको छ।
अमेरिकी राष्ट्रपति डोनाल्ड ट्रम्पले ह्वाइट हाउसमा पत्रकारसँग कुरा गर्दै भेनेजुएलाको तटसमिप्यै रहेको ठूलो तेल ट्यांकर कब्जामा लिइएको पुष्टि गर्नुभयो। बीबीसीले सार्वजनिक गरेको भिडियोमा अमेरिकी सैनिकहरू हवाई मार्गबाट डोरी प्रयोग गर्दै ट्यांकरमा झर्दै गरेको देखिन्छ।
अमेरिकी दाबी अनुसार उक्त ट्यांकर इरान–भेनेजुएलाबिच प्रतिबन्धित तेल ढुवानीमा संलग्न थियो।भेनेजुएलाले भने अमेरिकाको कदमलाई अन्तर्राष्ट्रिय समुद्री डकैती भन्दै कडा विरोध गरेको छ। यसअघि नै राष्ट्रपति मदुरोले भेनेजुएलालाई “तेल उपनिवेश” बनाउन अमेरिकी प्रयास अस्वीकार्य हुने बताएका थिए।
उक्त घटनापछि विश्वबजारमा तेल आपूर्तिको जोखिम बढेको भन्दै कच्चा तेलको मूल्य केही अंकले उक्लिएको विश्लेषकहरूले बताएका छन्। अमेरिकी कारबाहीमा २ हेलिकप्टर, १० कोस्ट गार्ड सदस्य, १० आधुनिक डुङ्गा र विशेष फोर्सको टोली सहभागी थियो।
भेनेजुएलाको सरकारले विज्ञप्ति जारी गर्दै अमेरिकाको कदमलाई गम्भीर अन्तर्राष्ट्रिय अपराध भनेको छ। हालै अमेरिकाले झण्डै ९ हजार सैनिक क्यारेबियन समुद्री क्षेत्र भेनेजुएलाको उत्तरी सीमा नजिकतैनाथ गरेको छ।
साथै विश्वकै ठूलो युद्धपोतमध्ये एकलाई पनि त्यही क्षेत्रमा परिचालन गरिएको छ, जसले सम्भावित सैन्य तनाव बढाएको बताइएको छ।
