- २६ असार २०८३, शुक्रबार / Jul 10, 2026
विराटनगर विमानस्थलमा २७ लाखसहित दुई यात्रु पक्राउ
एक नेपाली र एक भारतीय नागरिक नियन्त्रणमा
अलग–अलग दिनमा सुरक्षा जाँचका क्रममा पक्राउ
झोलाभित्र लुकाइएको नगद बरामद
थप अनुसन्धानका लागि प्रहरी हिरासतमा
मोरङ, २० बैशाख । विराटनगर विमानस्थलमा सुरक्षा जाँचका क्रममा स्रोत नखुलेको करिब २७ लाख रुपैयाँसहित दुई जना यात्रु पक्राउ परेका छन्। दुई दिनको अवधिमा अलग–अलग घटनामा उनीहरूलाई नियन्त्रणमा लिइएको जिल्ला प्रहरी कार्यालय मोरङले जनाएको छ।
विराटनगरबाट काठमाडौँ जान लागेका फरक–फरक एयरलाइन्सका यात्रुहरूले झोलाभित्र अवैध नगद लुकाएको अवस्थामा रकम फेला परेको हो। पक्राउ पर्नेमा एक नेपाली र एक भारतीय नागरिक रहेका छन्।
पहिलो घटना शुक्रबार साँझ करिब ८ बजे भएको हो। बुद्ध एयरको उडानमार्फत काठमाडौँ जान लागेका सुनसरी धरान–१८ का ३५ वर्षीय दिलीप तामाङलाई शंकास्पद गतिविधिका आधारमा चेकजाँच गर्दा उनको झोलाबाट ११ लाख रुपैयाँ स्रोत नखुलेको अवस्थामा बरामद गरिएको प्रहरीले जनाएको छ।
त्यसको भोलिपल्ट शनिबार दिउँसो ३:३५ बजे पुनः अर्को घटना भएको हो। श्री एयरलाइन्समार्फत काठमाडौँ जान लागेका भारत माल्दा जिल्लाका ३६ वर्षीय मोहिदिल अलिको झोलाबाट १५ लाख ९८ हजार रुपैयाँ फेला परेको प्रहरीले जनाएको छ।
प्रहरीका अनुसार दुवै घटनामा कुल २६ लाख ९८ हजार रुपैयाँ बरामद गरिएको छ। पक्राउ परेका दुवै जनालाई बरामद रकमसहित थप अनुसन्धानका लागि जिल्ला प्रहरी कार्यालय मोरङमा राखिएको छ।
