कुनै पनि नागरिक घरबारविहीन बन्न दिँदैनौं : रवि लामिछाने

काठमाडौँ, २० वैशाख । राष्ट्रिय स्वतन्त्र पार्टी (रास्वपा) का सभापति रवि लामिछानेले सरकारी जग्गामा बनेका अनधिकृत संरचना हटाउने क्रममा कुनै पनि नागरिकलाई घरबारविहीन बन्न नदिने बताएका छन् । आइतबार पार्टी केन्द्रीय कार्यालयमा सञ्चारकर्मीहरूसँग कुरा गर्दै उनले यस्तो स्पष्ट पारेका हुन् ।

लामिछानेका अनुसार अव्यवस्थित बसोबास र भूमिहीन सुकुमवासीको विषय समाधानका लागि शक्तिशाली प्राधिकरण वा आयोगमार्फत निर्णय गरिनेछ र सो निर्णय कार्यान्वयनमा ल्याइनेछ । उनले विशेषगरी नदी किनार, पहिरो जोखिम तथा बाढीको खतरा भएका क्षेत्रमा बसोबास गरिरहेका नागरिकलाई प्राथमिकताका साथ स्थानान्तरण गरिने बताए ।

उनले असुरक्षित बसोबासको समस्या तत्काल सम्बोधन गर्ने सरकारी निर्णय भइसकेको उल्लेख गर्दै काठमाडौंसहित देशभर यसबारे सूचना जारी गरिएको जानकारी दिए । साथै, जनतालाई आतंकित पार्ने काम केन्द्र सरकारले नगरेको दाबी गर्दै व्यवस्थित पुनःस्थापनामा जोड दिइने बताए । 

सरकारको नीति नागरिकलाई सुरक्षित स्थानमा स्थानान्तरण गर्ने र घरबारविहीन नबनाउने रहेको उनले दोहोर्‍याए । भूमिहीन सुकुमवासीको समस्या समाधानका लागि एकीकृत ढंगले काम अघि बढाइने पनि उनले संकेत गरे ।