- २८ श्रावण २०८३, बिहीबार / Aug 13, 2026
अस्ताना (काजाकिस्तान) । काजाकिस्तानको राजधानी अस्तानामा बुधबार ‘सी चिनफिङ : द गभर्नेन्स अफ चाइना’ पुस्तकको पाँचौँ खण्डको प्रवर्द्धन कार्यक्रम सम्पन्न भएको छ।
कार्यक्रममा सहभागीहरूले उक्त पुस्तकलाई नयाँ युगका लागि चिनियाँ विशेषतासहितको समाजवादसम्बन्धी राष्ट्रपति सी चिनफिङका विचार र शासन अवधारणालाई समेट्ने आधिकारिक कृतिका रूपमा व्याख्या गरेका छन्।
उनीहरूका अनुसार पुस्तकले चीनको विकास दर्शन, शासन अनुभव तथा भावी विकासको दिशाबारे अन्तर्राष्ट्रिय समुदायको बुझाइलाई अझ व्यापक र गहिरो बनाउन सहयोग पुर्याउनेछ। कार्यक्रममा चीनको १५ औँ पञ्चवर्षीय योजना (२०२६–२०३०) र काजाकिस्तानको ‘न्यायपूर्ण काजाकिस्तान’ निर्माण अभियानलाई सँगसँगै अघि बढिरहेको विकास यात्राका रूपमा प्रस्तुत गरिएको थियो।
सहभागीहरूले चीन र काजाकिस्तानबीचको दीर्घकालीन मित्रता, आपसी विश्वास, विकास साझेदारी र साझा समृद्धिलाई थप सुदृढ बनाउन सहकार्य विस्तार गर्नुपर्नेमा जोड दिएका थिए। यस अवसरमा चिनियाँ प्रतिनिधिहरूले ‘सी चिनफिङ : द गभर्नेन्स अफ चाइना’ को पाँचौँ खण्डको रुसी संस्करण तथा चौथो खण्डको काजाक भाषाको संस्करण काजाकिस्तानी अतिथिलाई उपहारस्वरूप हस्तान्तरण गरेका थिए।
कार्यक्रममा सहभागी विद्वान्, विशेषज्ञ, थिंक ट्याङ्क, विश्वविद्यालय तथा निजी क्षेत्रका प्रतिनिधिहरूले १५ औँ पञ्चवर्षीय योजना, उच्च गुणस्तरको बेल्ट एण्ड रोड सहकार्य तथा चीन–मध्य एसिया साझा भविष्यको समुदाय निर्माण लगायतका विषयमा विचार आदानप्रदान गरेका थिए।
उनीहरूले राष्ट्रपति सी चिनफिङको शासन दर्शन, जनता केन्द्रित विकास दृष्टिकोण तथा विश्वव्यापी सहकार्यको अवधारणाबारे आफ्ना अनुभव र धारणा प्रस्तुत गर्दै चीन–काजाकिस्तान सहकार्यबाट काजाकिस्तानका नागरिकले प्रत्यक्ष लाभ प्राप्त गरिरहेको बताएका थिए।
