युद्धले गाजाका किसानलाई ठूलो क्षति

एजेन्सी । गाजा शहरको पश्चिममा रहेको ताल अल–हवामा ४९ वर्षीय प्यालेस्टिनी किसान अक्रम अबु खोसा अहिले प्रायः आफ्नो बाल्कोनीमा चुपचाप बस्छन्। हातमा स्मार्टफोन लिएर उनी एक समयको जीवन्त स्ट्रबेरी खेतहरूको फोटो र भिडियो हेर्छन् ।

दुई वर्ष पहिले उनी हरेक बिहान खेतहरूबीच ताजा हावा सास फेर्थे। अहिले भने उनी फोटो र भिडियोमार्फत वरिपरिको विनाश हेर्न बाध्य छन्। बेइत लाहियामा रहेको अबु खोसाको पारिवारिक फार्म एक समय नवप्रवर्तनको नमूना थियो ।

उनी वार्षिक रूपमा करिब ३७ टन फलफूल उत्पादन गर्थे। तर अहिले उनका खेतहरू भग्नावशेष बनेका छन्। हमासद्वारा सञ्चालित गाजाका कृषि अधिकारीका प्रवक्ता मोहम्मद अबु ओडाकाका अनुसार अबु खोसा इजरायली आक्रमणका कारण आफ्नो जमिन गुमाउने ५५ हजारभन्दा बढी किसानमध्ये एक हुन् ।

करिब १ लाख ६७ हजार डुनम (१६ हजार ७ सय हेक्टर) कृषि भूमि नष्ट वा क्षतिग्रस्त भएको छ। प्रत्यक्ष कृषि क्षति ३२६ मिलियन अमेरिकी डलर पुगेको अनुमान गरिएको छ ।