- ३० भाद्र २०८३, मंगलवार / Sep 15, 2026
काठमाडौं । अहिलेसम्म निर्वाचनमा भाग नलिएका राजनीतिक दललाई ३० वैशाखमा हुने स्थानीय तह निर्वाचनमा भाग लिन गृहमन्त्री बालकृष्ण खाणले आग्रह गरेका छन् ।
बिहीबार सप्तरीको राजविराजमा आयोजित सुरक्षा गोष्ठीमा बोल्दै गृहमन्त्री खाणले राजनीतिक दलहरूलाई निर्वाचनमा भाग लिने वातावरण निर्माण गर्न स्थानीय प्रशासन र सुरक्षा निकायलाई निर्देशन दिए ।
खाण्ले भने, ‘आवधिक निर्वाचन लोकतन्त्रमा अपरिहार्य हो । म अहिलेसम्म निर्वाचनमा भाग नलिएका राजनीतिक दललाई यो निर्वाचनमा भाग लिएर नागरिकको सशक्तिकरण र विकास निर्माणको कार्यमा सहभागी हुन आग्रह गर्छु ।’
स्थानीय तह निर्वाचन शान्ति पूर्णरूपमा स्वच्छ, निष्पक्ष र धाँधलीरहित तरिकाले सम्पन्न गर्न प्रतिबद्ध रहेको बताए । सीमित स्रोतसाधनको उपयोग गरेर निर्वाचनको सुरक्षा प्रबन्धबारे सुरक्षा निकाय र स्थानीय प्रशासनले गरेको तयारी प्रशंशायोग्य रहेको खाणले बताए ।
आगामी दिनमा पनि यो भन्दा राम्रो व्यवस्थापन स्थानीय प्रशासन र सुरक्षा निकायले निर्वाचनका सन्दर्भमा गर्ने भन्दै आफू आशावादी रहेको बताए । सुरक्षा गोष्ठीका सहभागीले निर्वाचनको तयारी चुस्तदुरुस्त रूपमा आफूहरूले गरिरहेको बताए ।
