आगलागी हुँदा सात पसल नष्ट

नेपालगञ्ज । बाँकेको नेपालगञ्ज उपमहानगरपालिकास्थित बीपीचोकमा आज बिहान आगलागी हुँदा सात पसल जलेका छन् । विद्युत् चुहावट भइ आगलागी भएको प्रहरीले जनाएको छ ।

आलिया ट्रेडर्स, शादिया फर्निचर, शरीके फर्निचरलगायतका पसलमा सामान जलेर नष्ट भएको जिल्ला प्रहरी कार्यालय बाँकेका प्रहरी नायब उपरीक्षक नारायण डाँगीले बताए । सामान जलेर नष्ट भएको र क्षतिको विवरण सङ्कलन गरिरहेको जिल्ला प्रहरी कार्यालय बाँकेले जनाएको छ ।

आगो नियन्त्रणमा ल्याउन दुई घण्टा लागेको नेपालगञ्ज उपमहानगरपालिकाको दमकल शाखा प्रमुख झइनबहादुर खड्काले बताए । आगो निभाउन उपमहानगरपालिकाको तीन र कोहलपुर नगरपालिकाको एउटा दमकल प्रयोग गरिएको थियो ।