- १७ असार २०८३, बुधबार / Jul 1, 2026
भक्तपुर । गृहमन्त्रालयमा सरुवा भई जानुभएका प्रमुख जिल्ला अधिकारी हुमकला पाण्डेलाई एक समारोहबीच बिदाई गरिएको छ । भक्तपुर नगरपालिकाको आयोजनामा नगर प्रमुख सुनिल प्रजापतिले उनलाई दोसल्ला ओढाई भक्तपुरको प्रसिद्ध मयुर झयाल मायाको चिनो प्रदान गरी बिदाइ गरेका हुन ।
बिदाई कार्यक्रममा नगर प्रमुख प्रजापतिले भक्तपुर नगरपालिका सार्वजनिक हितको निम्ति विभिन्न चुनौतीको सामना गर्दै अगाडि बढिरहेको बताए । कोभिड महामारीबीच भक्तपुर नगरपालिकाले पारदर्शी ढंगले जनताको हितलाई प्राथमिकतामा राखी कार्य अगाडि बढाइरहेको भन्दै जनप्रतिनिधि, प्रशासन र स्थानीय जनताको संयुक्त प्रयासका कारण भक्तपुरमा कोरोना नियन्त्रणलगायतमा प्रभावकारी कामहरु भएको बताए ।
भक्तपुर नगरपालिकाको कार्यसम्पादन देशभरिका स्थानीय तहहरुले हेरिरहेको हुँदा जनप्रतिनिधि र कर्मचारीहरुले अझ बढी सेवाको भावनाले काम गर्नुपर्नेमा जोड दिए । भक्तपुर क्यान्सर अस्पताल सरकारको मातहतमा सञ्चालन हुनु सकारात्मक भएको भन्दै प्रमुख प्रजापतिले अस्पतालमा कार्यरत कर्मचारीहरुको व्यवस्थापनका विषयमा सम्बन्धित मन्त्रालयसमक्ष ध्यानार्षण गराइसकेको जानकारी दिए ।
कार्यक्रममा प्रजिअ हुमकला पाण्डेले भक्तपुरमा करिब १ वर्षको कार्यसम्पादनबाट आफू निकै सन्तुष्ट रहेको बताइन् । भक्तपुरको शिक्षा, स्वास्थ्य, विकास निर्माणलगायतका क्षेत्रमा भक्तपुर नगरपालिकाको कार्य प्रशंसनीय भएको भन्दै नगरपालिकाले जिल्ला प्रशासन कार्यालयप्रति गरेको सद्भाव र समन्वयप्रति आभार प्रकट गरिन् ।
भक्तपुर नपा ऐन, नियम र कानुन पालनामा अब्बल रहेको भन्दै भक्तपुरमा कोभिड १९ रोकथाम र नियन्त्रणका प्रयासहरु जनमैत्री भएको बताइन् ।
