- २८ जेष्ठ २०८३, बिहीबार / Jun 11, 2026
संखुवासभा । कागजमा कृषि कम्पनी खोलेर संखुवासभाका किसानलाई ठग्ने ३ जनालाई प्रहरीले पक्राउ गरेको छ । संखुवासभाको चैनपुर नगरपालिकामा ‘पोखरी ग्रुप अफ कम्पनी प्राली’ नामको कम्पनी खोलेर ठगी गर्नेहरुलाई चैनपुर प्रहरीले पक्राउ गरेको हो ।
पक्राउ पर्नेमा धनकुटा छथर घर भएका नरेन्द्र थापा उर्फ रमेश, चैनपुरका स्थानिय चन्द्र बहादुर आले र सुरेन्द्र राई उर्फ मिलन छन् । सो समूहले गाई पालन र दुध चिस्यान डेरी चलाउन साउदी अरेबियाको ‘अलदाना कम्पनी’बाट ५० प्रतिशत अनुदान आउँदैछ भनेर चैनपुरमा हल्ला फैलाए ।
कागजमा कम्पनी बनाए तर, कम्पनी रजिष्ट्रारको कार्यालयमा दर्ता गरेनन् । कम्पनीसँग कुनै सम्झौता नगरी भारतबाट १ लाख पर्ने गाई ल्याउने लोभ देखाएर उनीहरुले किसानसँग पैसा उठाएको ईलाका प्रहरी कार्यालय चैनपुरका इन्सपेक्टर योगराज खतिवडाले बताए । साउदी अरेबियाबाट ५० प्रतिशत अनुदान लिएर बाँकी ५० प्रतिसत लगानीमा चिस्यान केन्द्र, डेरी र गाईपालन संचालनको नाममा उनिहरुले किसानसँग २० लाख पेश्की रकम उठाएका छन् ।
