- १६ जेष्ठ २०८३, शनिबार / May 30, 2026
मुख्य बुँदा
नेपालबाट फरार १२ कैदी भारत प्रवेशको प्रयासमा पक्राउ।
दुई स्थानबाट गिरफ्तारी: सिद्धार्थनगर (८) र सोनौली नजिक (४)।
नेपाली कैदीहरू यौन हिंसा र लागुऔषध अपराधमा जेल परेका।
सुरक्षा कडा, फरार व्यक्तिहरूलाई कुनै हालतमा आश्रय नदिइने।
थप अनुसन्धान जारी।
लखनउ, २६ भाद्र । नेपालका विभिन्न कारागारबाट भागेका १२ जना कैदीलाई भारत प्रवेश गर्न खोज्दा उत्तर प्रदेशमा भारतीय सुरक्षाकर्मीहरूले पक्राउ गरेका छन्।
भारतीय सञ्चारमाध्यमका अनुसार यी गिरफ्तारीहरू दुई छुट्टाछुटै स्थानबाट भएका हुन्।सिद्धार्थनगरमा आठ जना र महाराजगन्ज जिल्लाको सोनौली सीमा नजिक चार जना पक्राउ परेका छन्।
सिद्धार्थनगरमा पक्राउ परेकामध्ये पाँच जना भारतीय र तीन जना नेपाली नागरिक रहेका छन्। नेपाली कैदीहरूमा हरिलाल (३५) र सुरज चौधरी (२९) रहेका छन्, जो यौन हिंसा र लागुऔषधसम्बन्धी अपराधमा जेल परेका थिए। भारतीय नागरिकहरू चोरी र लागुऔषध नियन्त्रण ऐन अन्तर्गत अपराधमा संलग्न थिए।
नेपालमा जारी हिंसात्मक प्रदर्शन र ठूलो सङ्ख्यामा भएका जेल ब्रेकका घटनापछि भारत-नेपाल सीमामा सुरक्षा जाँच कडा पारिएको छ। प्रहरी उपरीक्षक अभिषेक महाजनका अनुसार फरार व्यक्तिहरू खुनवा र अलिगढवा सीमा नाकाबाट नियन्त्रणमा लिइएका हुन्।
सशस्त्र सीमा बल (एसएसबी) का डीआईजी मुन्ना सिंहले नेपाली अपराधीहरूलाई भारतमा कुनै हालतमा आश्रय नदिइने बताएका छन्। पक्राउ परेकाहरूलाई सम्बन्धित निकायमा बुझाइएको पुष्टि गरिएको छ।
सोनौली नजिकै पक्राउ परेकामध्ये सम्भलका राजपाल सिंह र बाराबन्कीका मोनू कश्यप पनि रहेका छन्। प्रहरी उपरीक्षक सोमन्द्र मीनाका अनुसार जेलबाट भाग्नुको कारण र सीमा पार गर्ने प्रयासबारे थप अनुसन्धान भइरहेको छ।
