झापाको चाउचाउ उद्योगमा आगलागी

झापा । चीनगर–१४ दुहागढीमा रहेको मगमग चाउचाउ उद्योगमा आगलागी भएको छ । बिहान ४ बजेदेखि उद्योगमा आगो लागेको प्रहरीको भनाइ छ ।

आगो निभाउन झापा, मोरङ, इलाम र सुनसरीका १२ दमकलको प्रयोग गरिएको काँकडभिट्टाका प्रमुख प्रहरी नायब उपरीक्षक सुनिल दाहालले बताए । आगो अझै नियन्त्रणमा आइनसकेको उनको भनाइ छ।

नेपाली सेना, सशस्त्र प्रहरी, नेपाल प्रहरी र स्थानीयवासी आगो निभाउन प्रयासरत छन्। एक अर्ब रुपैयाँको लगानीमा स्थापना भएको यो उद्योगले मगमग, अकबरेलगायत चाउचाउ उत्पादन गर्दै आएको छ ।

आगलागीबाट उद्योगमा रहेका सबै सामान जलेर नष्ट भएको उद्योगका प्रबन्ध निर्देशक बुद्धि घिमिरेले बताए। आगलागीबाट मानवीय क्षति भने नभएको उनले बताए।

आगो चारैतिर फैलिएको हुनाले नियन्त्रण गर्न गाह्रो भइरहेको प्रहरी नायब उपरीक्षक दाहालले बताए।