दिल्लीसहित भारतका विभिन्न क्षेत्रमा अविरल वर्षा, राजस्थानका सबै विद्यालय बन्द

एजेन्सी, ९ भाद्र । भारतको राजधानी दिल्लीसहित विभिन्न क्षेत्रमा अविरल वर्षा भइरहेका कारण धेरै ठाउँमा बाढीको समस्या देखा परेको छ ।

राजस्थानका धेरै जिल्लामा २४ घण्टाभन्दा बढी समयदेखि भइरहेको ठूलो वर्षाले बाढीको जोखिम बढाएको बीबीसी हिन्दीले जनाएको छ । आज त्यहाँका सबै विद्यालयहरू बन्द गरिएको छ ।

पञ्जाबको पठानकोटमा पनि वर्षाका कारण सडकमा पानी जम्ने समस्या देखिएको छ र केही घर क्षतिग्रस्त भइसकेका छन् ।

यसअघि उत्तराखण्डको चमोली जिल्लामा गएको शुक्रवार वर्षाका कारण ठूलो बाढी आएको थियो । प्रशासनले विभिन्न जिल्लाका बासिन्दालाई आवश्यक कामबाहेक घर बाहिर ननिस्कन आग्रह गरेको छ ।