- ३० श्रावण २०८३, शनिबार / Aug 15, 2026
काठमाडौं । काठमाडौं उपत्यकासहित बागमती, कोशी र मधेश प्रदेशमा पानी परिरहेको छ । लगातार वर्षा भइरहँदा नदीमा बाढी आउन सक्ने जल तथा मौसम विज्ञान विभागले जनाएको छ ।
सप्तरीको चौरिया नदीमा पानीको तहले खतराको संकेत पार गरेको छ भने लुम्बिनी प्रदेशका थोरै र बाँकी प्रदेशका एक–दुई स्थानमा मध्यम वर्षा भइरहेको मौसमविद् विनु महर्जनले बताइन् ।
दिउँसो मधेश, लुम्बिनी र सुदूरपश्चिम प्रदेशको एक–दुई स्थानमा मेघगर्जन र चट्याङसहित भारी वर्षाको सम्भावना रहेको महर्जनले बताइन् । लुम्बिनी र सुदूरपश्चिम प्रदेशका तराईका थोरै स्थानमा हावाहुरीको सम्भावना छ ।
भारी वर्षा, मेघगर्जन, चट्याङ र बाढी, पहिरो तथा भू–क्षयका कारण हुन सक्ने जोखिम वा क्षतिबाट बच्न आवश्यक सतर्कता अपनाउन महाशाखाले सबैमा अनुरोध गरेको छ । बाढी पहिरोका कारण तीन राजमार्ग पूर्णरूपमा अवरुद्ध भएको सडक विभागले जनाएको छ ।
विभागको विवरण अनुसार मेची राजमार्ग, तमोर करिडोर र कोशी राजमार्ग अवरुद्ध भएका छन् । यस्तै १३ वटा सडक एकतर्फी सञ्चालनमा रहेको विभागले जनाएको छ । हालसम्म अवरुद्ध भएका ५७ वटा सडक सञ्चालनमा आइसकेको छ भने ७३ वटा अवरुद्ध भएको तथ्यांक छ ।
