पुनलाई खुकुरी प्रहार गर्ने ६ कि‍शोर पक्राउ

दाङ । खुकुरी प्रहार गरेको आरोपमा ६ जना किशोर पक्राउ परेका छन् ।घोराही उपमहानगरपालिका–१८ शंखेपिपल नजिक साउन १० गते तीर्थबहादुर पुनलाई खुकुरी प्रहार गरेको आरोपमा छजना पक्राउ परेका हुन् ।

सर्च अपरेसन चलाई फरार व्यक्तिलाई घटना भएको १४ दिनपछि पक्राउ गरिएको जिल्ला प्रहरी कार्यालय दाङका निमित्त कार्यालय प्रमुख राजनकुमार गौतमले बताए । पक्राउ पर्नेमा घोराही–१८ का १७ वर्षीय किशोर, घोराही–१४ गणेश मन्दिर टोलका १६ वर्षीय किशोर,

बंगलाचुली गाउँपालिका– १ जुम्लेपानी घर भइ घोराही–१८ बस्ने २० वर्षीय देवेन्द्र कँवर, घोराही–१८ का १७ वर्षीय किशोर, सैघा घर भइ घोराही– १८ बस्ने १७ वर्षीय किशोर र घोराही–१८ मसिनाका १५ वर्षीय किशोर गरी छ जनालाई पक्राउ गरेको प्रहरीले जनाएको छ ।

उनीहरूलाई ज्यान मार्ने उद्योग सम्बन्धि कसुरमा जिल्ला अदालतबाट पाँच दिनको म्याद लिइ थप अनुसन्धान भइरहेको प्रहरी नायब उपरीक्षक गौतमले बताए । साउन १० गते राति पुनमाथि खुकुरी प्रहार गरी टाउको, अनुहार, बायाँ हातको कान्छी औँलाबाहेक सबै औँलाको हड्डी काटिएको,औँला हातमै रही गम्भीर घाइते भएको अवस्थामा वडा प्रहरी कार्यालयको टोलीले फेला पारेको थियो ।घाइते पुनको भैरहवा मेडिकल कलेजमा उपचार भइरहेको छ ।