- १६ आश्विन २०८३, शुक्रबार / Oct 2, 2026
काठमाडौं, २६ भदौ । भोटेकोशी नदीमा आएको बाढीले नुवाकोटको विदुर र बेलकोटगढी नगरपालिका जोड्ने देवीघाटस्थित तादी खोलाको पुल बगाएपछि नेपाली सेनाले पाँच दिनमै नयाँ पुल निर्माण गरेको छ ।
भदौ २० गतेदेखि निर्माण सुरु गरिएको पुलमा हिजो बेलुकादेखि सबै प्रकारका सवारीसाधन सञ्चालनमा आएका छन् । नेपाली सेनाको १४ नम्बर बाहिनीअन्तर्गतको ब्रिजिङ युनिटले ७२ घण्टाभन्दा कम समयमै पुल तयार पारेको जनाएको छ ।
नवनिर्मित पुलको भारवहन क्षमता ६० टन रहेको छ । पुल सञ्चालनमा आएसँगै विदुर र बेलकोटगढी हुँदै धादिङ तथा रसुवागढीसँगको सडक सम्पर्क पुनः जोडिएको छ ।
पुल बगाएपछि स्थानीयवासीले लामो तथा घुमाउरो बाटो प्रयोग गरेर आवतजावत गर्नुपर्ने बाध्यता थियो । नयाँ पुल सञ्चालनमा आएपछि स्थानीयको आवतजावत सहज हुनुका साथै मालवाहक तथा अन्य सवारीसाधनको आवागमनसमेत सहज भएको छ ।
नेपाली सेनाले गजुरीमा रणनीतिक जगेडाका रूपमा भण्डारण गरेर राखेको एक्रोब्रिज देवीघाटमा ल्याएर जडान गरेको हो । बाढीबाट सडक तथा पुलमा पुगेको क्षतिका कारण प्रभावित सडक सम्पर्कलाई तत्काल पुनःस्थापित गर्ने उद्देश्यले सेनाले तीव्र गतिमा पुल निर्माण गरेको जनाएको छ ।
पुल सञ्चालनमा आएपछि नुवाकोटका प्रभावित क्षेत्रसँगै धादिङ र रसुवातर्फको आवागमन तथा राहत सामग्री ओसारपसारमा समेत सहज हुने अपेक्षा गरिएको छ ।
