भरतपुर अस्पतालमा नवजात शिशु र सुत्केरीको मृत्यु

चितवन । भरतपुर अस्पतालमा सुत्केरी गराउन आएकी एक महिला र उनको नवजात शिशुको मृत्यु भएको छ ।

अस्पतालको प्रसूति वार्डमा फागुन २४ गते भर्ना भएकी कावासोती नगरपालिका ४ हसौराकी २७ वर्षीया गंगा गैरे गौतम र उनकी नवजात शिशु (छोरी) को मृत्यु भएको हो । गंगाले साधारण तरिकाले नै शुक्रबार छोरी जन्माएकी थिइन् ।

उनको अत्याधिक रक्तश्राव भएर मृत्यु भएको अस्पतालका मेडिकल सुपरिटेण्डेन्ट डा.कृष्ण पौडेलले बताए । अस्पतालका प्रसूति रोग विभाग प्रमुख डा.सुनिलमणि पौडेलले डिआइटी भएका कारण सुत्केरी महिलाको मृत्यु भएको बताए ।

पौडेलले भने, ‘यो निकै कम महिलामा देखिने समस्या हो, हामीले बचाउने प्रयास गर्‍यौं तर, अन्तिममा मल्टिपल अर्गान फेल्योर भयो ।’