रेडियोबाट अव्यवहारिक रूपमा लिइँदै आइएको रोयल्टी मिनाहा गर्न अर्थमन्त्रीलाई आग्रह

काठमाडौं । सरकारले बजेटमा स्वतन्त्र रेडियोलाई सम्बोधन नगरेकोमा विरोध गर्दै रेडियोबाट अव्यवहारिक रूपमा लिइँदै आइएको रोयल्टी मिनाहा गर्न अर्थमन्त्री डा.प्रकाशशरण महतको गम्भीर ध्यानाकर्षण गराएका छन् ।

सामुदायिक रेडियो प्रसारक सङ्घ अकोराब र ब्रोडकास्टिङ एशोसिएसन अफ नेपाल बानले बजेटमा सम्बोधन गर्नुपर्ने विषयसहित सञ्चार तथा सूचना प्रविधि मन्त्री रेखा शर्मा र अर्थमन्त्री डा. प्रकाशशरण महतलाई भेटेर ध्यानाकर्षण गराएका हुन् ।

अकोराबका अध्यक्ष अर्जुन गिरी र बानका अध्यक्ष कुमार भट्टराईले संयुक्त विज्ञप्ति निकालेर आगामी आर्थिक वर्षको बजेटमा रेडियोहरूको नवीकरण तथा रोयल्टी शुल्कमा छुट गर्न, नवीकरण, करलगायतमा अन्य संस्थासरह नियमानुसार राजस्व तिरिरहेका स्वतन्त्र रेडियोबाट अव्यवहारिक रूपमा लिइँदै आइएको रोयल्टी मिनाहा गर्न

नीतिगत व्यवस्था गरी दोहोरो–तेहेरो कर असुली अन्त्य गर्नुपर्ने लगायत माग गरेका छन् । बजेटमा सम्बोधन गर्नुपर्ने विषयसहित लिखित रूपमा ध्यानाकर्षण गराइएको र सरकारले स्वतन्त्र रेडियोलाई बेवास्ता गरे कडा आन्दोलन गर्ने चेतावनी दिएका छन् । डा महत र सञ्चार तथा सूचना प्रविधि मन्त्री शर्माले जवाफमा सकारात्मक प्रतिक्रिया जनाएका छन् ।