विदेशी आउँदा दिनमा ५ वटा सम्म विमान चार्टर, हवाई टिकटमा ठूलाबडाको मात्रै वर्चश्व

काठमाडौं । हिमाली क्षेत्रका सर्वसाधरणलाई हवाई टिकट पाउन मुस्किल भएको छ । सडक सञ्जाल नपुगेका सुदूरपश्चिम र कर्णाली प्रदेशका विभिन्न जिल्लामा हवाई टिकट पाउँन मुस्कील भएको हो । नेपाल वायुसेवा निगमका उडानहरु अत्यन्तै न्यून हुनु, निजी एयरलाइन्सहरुले नियमित उडानलाई भन्दा चार्टर उडानलाई प्राथमिकतामा राखेका कारण नियमित हवाई उडानमा सर्वसाधरणलाई टिकट पाउन मुस्किल हुने गरेको हो ।

मौसमको प्रतिकुलता र एयरलाईन्सहरुको सिमित उडान भएकाले हवाई टिकटमा ठूलाबडाको मात्रै वर्चश्व हुने गरेको देखिन्छ । विदेशी टोली आउँदा दिनमा ५ वटा सम्म चार्टर गर्ने निजी एयरलाईन्सहरुले ती उडानमा स्थानीयका लागि एउटा पनि सिट राख्दैनन् । कार्गो उडान गर्ने, विदेशी ओसार्ने तर आफूहरु बिरामी हुँदा पनि उडानको टिकट नपाएर उपचार अभावमा ज्यान गुमाउनुपर्ने भन्दै स्थानीयहरु हवाई उडान सेवा प्रति नै आक्रोशित बन्दै गएका छन् ।