- ५ कार्तिक २०८३, बिहीबार / Oct 22, 2026
काठमाडौं । २० वर्षपछि सार्वजनिक सवारी चलाउन नपाइने सरकारी व्यवस्था खारेज गर्न व्यवसायीले आग्रह गरेका छन् । गाडीलाई ‘फलाम’का रुपमा मात्र नअर्थ्याएर आयु तोक्न संघ र प्रदेश सरकारहरुमाथि व्यवसायीले दबाव दिएका थिए ।
दुर्घटना न्युनीकरण गर्ने तथा सवारी सुरक्षा बढाउने उद्देश्यले सरकारले २०७३ मा २० वर्ष पुगेका सवारी सञ्चालनमा रोक लगाएको थियो । २०७३ फागुनयता सडकमा उक्त गाडी चल्न दिएको छैन । निजी र सरकारी गाडीको भने आयु तोकिएको छैन ।
अब व्यवसायीको मागअनुसार सार्वजनिक सवारीको पनि आयु असीमित बनाउन सरकार उदार देखिएको छ । तर सरोकारवालाले भने उक्त २० पर्षे आयु यथावत राख्न माग गरेका छन् ।
आइतबार सातवटै प्रदेशका यातायात मन्त्रीहरुको यातायातसम्बद्ध अन्तरतह समन्वय बैठकमा २० वर्ष पुराना सवारी साधन चलाउन नपाइने २०७३ सालको निर्णय पुनरावलोकन गर्ने सहमति गरेका थिए ।
त्यसअनुसार कानुनी गृहकार्य पनि सुरु भएको यातायात मन्त्रालयका एक अधिकारीले बताए । पुराना सवारीलाई विशेष जाँचपास गराएर चल्न दिने व्यवस्था गर्ने तयारी भएको भौतिक पूर्वाधार तथा यातायातमन्त्री मोहम्मद इस्तियाक राईको सचिवालयले जनाएको छ ।
