विद्यालय पीडितका परिवारलाई ८ लाख क्षतिपूर्ति दिन सहमत

काठमाडौं । स्कुलको होस्टलमा मृत भेटिएकी रमा रायमाझीको शव उठाउन परिवार सहमत भएका छन् । बुद्दनगरस्थित केएमसी स्कुलमा शानिवार साँझ उनी मृत फेला परेकी थिइन् । घटनाबारे उपत्यका अपराध अनुसन्धान कार्यालय र जिल्ला प्रहरी परिसर काठमाडौंले अनुसन्धान शुरु गरेका छन् ।

आइतबार दिनभर स्कुल अगाडि आफन्तले प्रदर्शन गरेका थिए । शनिवार अबेरसम्म रमा घर नआएपछि उनकी बहिनी गोमा स्कुलमा गएकी थिइन् । गोमाले नै दिदी झुण्डेको देखेको बताइएको छ । काभ्रे घर भएकी २१ वर्षीया रमाको शव उठाउन परिवारसँग सहमती भएको जिल्ला प्रहरी परिसर काठमाडौंले जनाएको छ ।

विद्यालय पीडितका परिवारलाई ८ लाख क्षतिपूर्ति दिन सहमत देखिएपछि उनको शव उठाउन परिवा सहमत भएको हो । रमाको हत्या आशंका गरेर छानविन र क्षतिपूर्तिको माग गर्दै आफन्तले शव उठाउन रोकेका थिए । होस्टलको डबल टेकर खाटमा झुण्डिएको अवस्थामा रमाको शव भेटिएको थियो ।